Israel-ah lungawilohna nasa tak thleng

Sawiselna nasa tak leh lungawilohna turu tak kalpui a ni chungin Israeli MP te chuan bill sawisel hlawh tak mai chu an pawm fel ta.
He dan hmang hian sorkar thutlukna siam Supreme Court-in a thiah theihna chu sorkarin ‘awm ang lo’ a ti a nih chuan a hnawl thei dawn a ni.
He hmalakna hi tun hnaia Israel a reform siam tum kha taka chhuak ta court thiltihtheihna tihnep tumna kal zel a ni a.
He reform kalpui tum avang hian Israel history-a lungawilohna lian ber ber thleng tawhin opposition te chuan Israel democracy ram a nihna tibahlahtu tur a ni, an ti a.
Sorkar erawh chuan thuneihna inbuktawk lo, politics lama thutlukna siama court inrawlh fo siamthatna tur an ti ve thung.
“Reasonableness” bill tia hriat lar hi opposition ten an boycott hnuah Israel parliament-ah vote lak niin vote 64 hmuin pakhat mah a kalh zawnga vote thlak awm lovin a tlang zui ta a ni.
Knesset (parliament) ah opposition leader Yair Lapid chuan sorkar hmalakna chu ‘Israel majority te extreme minority tena an chungtlakna’ tiin a sawi.
Mahse Prime Minister Benjamin Netanyahu chuan court chu independent a la ni reng dawn a ti thung a. He bill hi sorkar tan ‘he rama khua leh tui tam zawkte tana policy kalpuina tur thutlukna siam nana tihmakmawh’ tiin a sawi.
Vote thlak a nih hma hian boruak rip tak awmin Israel president chuan Thawhtanni khan political leader te chu ‘national emergency’ dinhmunah kan ding thei reng a ti hial a. He bill hmang hian Netanayhu chuan Iasrael chu theocracy rama din a tum tiin sawisel tute chuan an sawi.
Lungawilote chuan Prime Minster Benjamin Netanyahu chu bang turin an ngen a, opposition te mai bakah top official hlui te Israel military, intelligence leh security service hotu hlui te bakah chief justice hlui leh legal figure leh business leaders te pawhin he dan thar hi an duh lo hle a ni.
Military reservists te air force pilot te Israel defence-a mi pawimawh tak tak te chuan service chhunzawm lohah hial an vau bawk a ni.
He bill hian Israel judicial system chu a tichak lo hle dawna ngaih niin sorkar thuneihna a hman dik leh dik lo enfiah rengtu chu tihchak lovin a awm dawnah an ngai a ni.
Netanyahu hi Israel history a ‘most right-wing’ anga ngaih a ni a. Netanyahu ber hi eiruk thubuai nasa tak nei mek niin tuna dan thar hi ama him nana ruahmanna a siam an ti bawk.
Sorkar thung chuan judicial lam chu legislation lamah inrawlh nasa tiin liberal issue thlawpin judge te ruatna kalpui dan pawh a democratic lo a ti ve thung.
Tuna sorkarin ruahmanna thar kalpui a tum danah chuan Supreme Court thutlukna siam chu review theih turah dahin court thutlukna chu Knesset a ngaihtuahin simple majority hmanga hnawl mai theih a ni dawn a ni.
Hei bakah hian judge ni turah sorkar chuan thuneihna sang tak nei tawh dawnin judge thlangu tur committee ah aiawh a ti tam tawh bawk ang.
Tun dinhmuna minister tena legal adviser an neihte thurawn an pawm ngei ngaihna attorney general-in a kaihhruai te chu hnawl a ni tawh dawn bawk a ni.
Israel-ah he dan avanga lungawilohna a la chhunzawm zel tura ngaih a ni a. Netanyahu chuan reform an kalpui turah mipuite remtihna lak tumin hma la zui zel dawnin Knesset summer recess August atanga October thla laihawl thlenga neih turah nasa zawkin hmalakna an nei ang, a ti a.
Mahse prime minster hi a a cabinet-a far-right minister te lakah thuk takin a innghat a, chung mite tello chuan a sorkar chu tluchhe mai tur a ni thung. Chung far-right minister te chuan reform chu siamthat awm hauh lova pawm bur tur an ti thung a ni.
Opposition-te chuan inbiakna kalpui zui an duh loh thu an sawi a. Israel labour union lian ber te chuan lungawilohna liantham tak kalpui tum bawkin hei vang hian Israel buaina chuan rehlam a pan mai hmel loh hle a ni.
A hma pawhin Netanyahu hian he bill duh lo zawnga tawngchhuak a defence minister Yoav Gallant chu a lo ban tawh a. Gallant ban duh loha lungawilohna lantir tam tak te chu Jerusalem-ah police-te nen an inbeih phah tawh a ni.
Israel president Isaac Herzob =awhin sorkar chu reform a kalpui tur titawp lailawk turin a lo ti hial tawh bawk a ni.
He judicial system reform hmang hian Israel sorkar chuan court a judge te ruatnaah thuneihna a nei tawh dawn a. Court-in office luah tlak lo tia thutlukna a siam thinah thuneihna a nei zui tawh dawn lo va, chutak chu eirukna thubuai nasa tak hmachhawn mek Netanyahu an inhumhim a tumna tia ngaihsak a ni.