Israel beihna vangin damdawiin khar

Lebanon chuan Israel in Hezbollah ho a beihna avangin an ram damdawiin pali chu khar a nih tawh thu an sawi.
Lebanon sorkar chuan Israel in nasa taka Hezbollah ho a beih avang hian an ramchhunga damdawiin leh hriselna lama thawktute thlengin harsatna an tawk tih an sawi a, heng damdawiin an khar palite phei hi chu dinhmun hlauhawm takah an dinna a rei tawh avang leh darkar 24 chhung ngawta thawktute leh an damdawiin kaihhnawiha khawsa mi 11 in nunna an chan avangin khar loh theih loh a nih thu an sawi.
Zirtawp zan khan Israel sipaite chuan Hezbollah ho an beih vangin damdawiin thenkhatte chu an chhiat tel phah tih an sawi a, damdawiin leh a kaihhnawiha khawsa leh thawk ringawt pawh mi 37 chuangin nunna an lo chan tawh thu an sawi bawk.
Israel hian Hezbollah ho beihna hi a kalpui nasa zual hle a, an hruaitu thahnem tak tihlum tawhin, an chet velna bial chhung chu tihchhiat vek tumin an bei mek a, helai vela civil mi tam tak chuan hmun him lamah bihrukna an lo zawng tawh a ni.
Lebanon in an damdawiin an khar thu an sawi pawh hi a awm viau a, a lehlam zawng chuan Israel tan an beihte hmun khuarna lai a nih avangin him bik tura tih ngawt theih a ni bawk si lo. Israel leh Lebanon buaina hian reh lam a la pan maiin a rinawm loh a ni.