Israel chetnaah mi 73 thi leh

Inkahhai puang tura inremna siam a nih avanga Gaza-a mite an lawm hle laiin Israel chuan kalpui tan a nih hmain nasa takin a chhui zui zel tho va. Inremna a awm tih puan a nih hnuah mi 73 vel an thi belh leh tawh.
“Inremna hi kan nghakhlel a, kan hlim hle a. October 7 hnua kan hlim ber zan a ni,” tiin Gaza-a cheng pakhat, Saeed Alloush chuan a sawi.
“Chutih mek lai chuan mi 40 zet an martar thu kan dawng zui lehnghal zat bawk,” a ti a, an zingah hian a pate pawh a tel tih Alloush-a chuan a sawi. “Kan vel chu hlimna atangin lungngaihnaah a let thut a ni ber a, lirnghingin min sawi ang mai a ni,” a ti.
Israeli sipaiten Gaza an beih chhunzawmna thar ber hi Qatar leh US palaina hnuaiah inkahhai puang tura inremna siam a nih tak thu puan hnuah a ni a, inremna hi Pathianni atang hian hman tan tura ruahman a ni.
Inremna siam a nih hnua Gaza an bei leh nia sawi chungchangah hian thuthar lakhawmtuten Israeli sipaite chu an bia a, engmah an la sawi ve rih lo.
Gaza-a civil defence agency thupuangtu, Mahmud Bassal chuan Nilainia inremna neih a ni tih puan hnuah khan Israeli thlawhnaten an beih zuinaah mi 73 vel thi an awm leh tawh niin AFP hnenah a sawi. An zinga 20 chu naupang niin hmeichhia 25 nen an ni a, mi 200 vel hliam tuar an awm bawk tih a sawi.
October 7, 2023 khan Gaza-a Hamas ralthuam kengte chu Israel chhim lamah lutin mi 1,200 chuang thatin mi 251 chu hren zui atan an hruai haw a. Hemi phuba lak nan hian Israel chuan sipai chakna hmangin Hamas chhut chimih tumin a bei zui ta a ni.
Gaza-a Hamas thuhnuaia awm health ministry chuan mi 47,000 vel thi an awm tawh tih an sawi a, mi nuai tel baihvaiin an awm bawk. Inkahhai puang tura inremna siam tumin ram dang an palai a, rei tak tihkhawtlai a nih hnuah Nilaini zan khan an inrem thei ta a ni.