Israel-Gaza inkahhaina tur rawtna thar siam

Israel-Gaza inkahhaina tur rawtna thar siam
Israel-Hamas inkahhai a awm theih nana inbiaknaa tel Palestinian hotu lawk chuan Qatari leh Egyptian palaiten Gaza-a indona a tawp theihna turin ruahmanna thar an siam tih a sawi.
A sawi dan chuan inrin tawnna tur ruahman hi kum nga atanga sarih awh tur niin Israeli mi hrente chu chhuah vek an ni a, Israeli lung ina Palestinian tangte chhuah an ni bawk ang a, indona tawpin Israeli-te pawh Gaza atangin an chhuak dawn a ni.
Hamas hotu lian kaihhruai palaite chu Cairo-a inrawn turin an kal thuai dawn.
Inkahhai puan hmasak kha thla khat liam ta khan tawpin Israel chuan Gaza a bei chhunzawm lehnghal a, lehlam lehlam hian inkahhai kalpui zui zelna turah thil bawhchhiat an nei niin an inpuh ve ve.
Israel chuan palaiten ruahmanna thar an neih hi engmah an la sawi ve lo thung.
Hamas aiawh hian Cairo-a inbiakna tur hi an political council-a an hotu ber, Mohammed Darwish-a chu a tel dawn a, ani bakah hian indawrnaa an khaipa ber, Khalil al-Hayya a tel bawk ang.
Tun hnai lawkah khan Hamas hian Israel-un an rawtna neih thar an lo hnawl tawh a, hetah hian chawlhkar ruk chhunga Hamas-te chu ralthuam tung vek turin an rawt a ni.
Inrinni khan Israeli Prime Minister Benjamin Netanyahu chuan Hamas an chhut chimih vek hma leh mi hrente an hruai kir hma chu indo a tawp dawn lo tih a sawi a. Hamas hian mi hrente an chhuah hmain Israel-in indo titawp tura a intiam an phut ve thung.
Palestinian hotu sang pakhat chuan Hamas hian Gaza chu Palestinian-te telna a nih chuan eng kutah pawh hlan an remti niin a sawi a. Heti a nih chuan West Bank-a Palestinian Authority (PA) kutah emaw, awptu thar din kutah emaw a awm hmel hle a ni.
Netanyahu-a pawhin nakin zelah kum 2007 atanga Hamas thuhnuaia awm, Gaza hi PA kuta dah hi a hnawl lem lo bawk.
Tun dinhmunah erawh inkahhai puan tura rawtna awm hi a hlawhtling dawn tih sawi mai thei a la ni lo va, palai hna thawktute erawh chuan theihtawp an chhuah zel a, Hamas pawh ‘an beisei phak bakin an inhawng’ niin an sawi.
Hamas-te hian October 7, 2023 khan Israel beiin mi 1,200 an thah bakah Gaza-a hren turin mi 251 an hruai a. Israel hian sipai chakna hmanga bei letin tun thlengin Palestinian 51,240 an thi tawh a, a tam ber hi civil mi niin Gaza-a Hamas enkawl health ministry chuan a sawi.
Hetih lai hian Gaza atanga damdawi thila lak chhuahte lo buaipuitu leh puihna tam tak peknaa an hman, Cairo-a Palestinian Embassy-a thawkte chu an chhungte nen Gaza ramri bul, Egyptian khawpui pakhat, Arish-a insawn tura tih an ni.