Israel-in an tumhmun beitu Houthi chhang let dawn

Israel-in an tumhmun beitu Houthi chhang let dawn
Israeli Prime Minister Benjamin Netanyahu chuan missile hmanga an rama thlawhna tumhmun lian ber kaptu, Houthi chu an chhan let ngei tur thu a sawi.
Social media-a video a dahah Netanyahu-a chuan, “Tun hma pawhin kan lo bei tawh a, kan la bei leh bawk ang,” a ti.
Missile hi Iran-in a puih pawl hian Yemen atangin an kap chhuak a, Pathianni tuk khan Ben Gurion tumhmun terminal lian ber bul lawkah a tla a ni tih Israeli thuneituten an sawi.
He thil thlengah hian mi paliin hliam an tuar a, inhumna zawnga tlanchhia pahnihin hliam an tuar bawk niin Israeli chanchinbute chuan emergency services puan an tar lang.
Houthi sipai thupuangtu, Yahya Saree-a chuan TV-a thuchah a tihchhuahah Israeli tumhmun chu ‘zin nan a him tawh lo’ tih a sawi.
Israeli Defence Minister Israel Katz-a chuan, “Tu pawh min kaptu chu a let sariha nain kan kap let ve ang,” a ti.
Online-a video darh pakhatah chuan Tel Aviv khawpui bula kawnga tlan lai lirthei khalhtuten kawng an thian lai a lang a, tumhmun bulah hian meikhu dum tak a inziak bawk.
Tumhmun hi reilo te khar a nih hnuah hawn leh a ni tawh a, hetih lai hian airline lian tak tak – Lufthansa, Air France leh Delta te chuan Pathianni khan thlawh chhuah leh luh an chawl rih.
Missile-in a pan lai hian Israel hmun hrang hrangah siren a ri a, Israeli Air Force chuan an lo kah thlak loh theih dan chu an chhui dawn.
Netanyahu-a chuan Pathianni zan khan a minister leh defence thuneitute a ko khawm niin tual chhung chanchinbute chuan an tar lang hlawm.
Houthi hi Iran-in a puih hel pawl, Yemen-a awm an ni a, Gaza-a Hamas an thlawpzia lantir nan missile-in Israel lam hawiin an kap reng a; mahse, air defence-in a tam zawk hi chu a tum a fuh hmain an lo kap thla hman thin.
Red Sea-a lawng veite pawh an lo bei tawh thin bawk a, hei vang hian US chuan a lo bomb phah tawh a, UK-in a pui bawk.