Israel-in Druze chhana a kah hnuah Syria-in an himna a tiam

Israel-in Druze chhana a kah hnuah Syria-in an himna a tiam
Israel-in Syrian sipaiten Druze-te an bei nia puha a beih let hnuah Syria-a president lailawk chuan Suweida province-a sakhaw zuitu tlem zawk hnamte himhim chu ‘a ngaih pawimawh’ a nih thu a sawi.
Nilainia Israelin thlawhna hmanga Damascus a kah hnua TV-a thu a sawina hmasa berah Ahmed al-Sharaa hian Syrian-te chu indo hlau lo turin a ti.
Syrian sorkar chanchinbu chuan Druze hruaitute nen inkahhai inremna an siam hnuah sipaiten Suweida an chhuahsan niin an tar lang a; mahse, an la thunun zui dawn em a hriat loh.
Pathianni atanga Druze ralthuam kengte leh Bedouin hnam intihbuainaah mi 350 chuang thi an awm tawh.
Sorkar chuan a hmet mit turin Sharaa-a kaihhruai Sunni Islamist pawlin hela December-a President Bashar al-Assad-a an paih thlak hnua a vawi khat nan Druze mite chen tamna, Suweida-ah hian sipai a dah lut.
Mi chengte leh mihring dikna chanvo humhalhtute chuan sorkar tirh sipaite hian Druze mite an that a, rawng tak takin mi an ti niin an sawi zui.
Druze sakhua hi Shia Islam peng niin anmahni pualin rin dan leh nihna an nei a. Syria bakah hian Lebanon, Jordan, Israel leh Golan Heights-ah an awm nual.
Syrian Druze leh hnam leh sakhaw zuitu tlem zawkte hi Sharaa-a’n thuneihna a chan hnuah tihduhdah an tawk nasa nia sawi a ni a. A kaihhruai Islamist pawl, Hayat Tahrir al-Sham (HTS) hi al-Qaeda nena inzawmna nei thin an ni nghe nghe.
May thlaah khan Druze ralthuam kengte leh venhim hna thawktute leh Islamist fighter te an lo intibuai tawh bawk a, Israel pawh a lo inrawlh tawh.
Ningani hma taka thuchah a sawiah Sharaa chuan Druze-te chu ‘ram cheimawitu pakhat’ an nih thu sawiin a kuta hnuh luh tumna awm anga sawi chu a dik loh thu a sawi.
President hian Suweida-a sipai tirh luh chu ‘Israeli-te inrawlh mah se muanna vawn nuna dan pawna awmte hnawh chhuahna tur’ a nih thu a sawi a. Israel inrawlhna chuan thil a tibuaithlakin inepna lian zawk a hring thei niin a sawi.
Suweida-a himna chu sakhaw upa leh tual chhung mi, ram thatna tur ngaihtuahtute kutah dah a ni tawh tih a sawi bawk.
Nilaini khan Israel Prime Minister, Benjamin Netanyahu-a chuan an rama Druze mite hnenah an sipaiten ‘Druze unaute chhan tuma beiin mi sual rualte an tichimit dawn’ tiin a hrilh.
Israeli sipaite hian Damascus-a Syrian sipai hmunpui leh presidential palace bula an hmun dang an kap tih an sawi a. Suweida pan tur sipai lirthei leh Suria chhim lama an duty-na hmun leh ralthuam dahna an kap bawk tih an puang.
UK-a Syrian Observatory for Human Rights (SOHR) chuan Pathianni atanga hnam hnih intihbuaina chhuakah mi 350 chuang an thi tawh niin a sawi.
Thi zinga 79 chu Druze fighter niin civil mi 55 an thi tel a, an zinga 27 hi interior ministry leh defence ministry sipaite tih niin an sawi bawk.
Intihbuainaah hian sorkar sipai 189 vel leh Bedouin tribal fighter 18 an thi bawk niin an sawi.