Israel-in East Jerusalem-a UN sikul pathum a kharsak

Israel-in East Jerusalem-a UN sikul pathum a kharsak
Silai nena inthuam Israeli venhim hna thawktuten UN hnuaia Palestinian raltlante tana thawktu, Unrwa-in Israeli-te thunun East Jerusalem-a sikul pathum an khar lui.
Ningani tukah khan Shuafat refugee camp-a sikul pathumte hi class an tan hnu deuh lawkah kharsak niin Palestinian zirlai tam tak hawtir an ni.
Unrwa Commissioner-General Philippe Lazzarini chuan Israeli thuneitute hian naupangten lehkha zir tura dikna chanvo an neih chu an hnawlsak nia sawiin ‘khawvel dan an bawhchhia’ niin a sawi.
Israeli-te hian kumin kum tir lamah khan Unrwa hi hna an thawh an phal tawh lo va Israel chuan agency hi Hamas-in an luh ruktir niin an sawi a. Unrwa erawh chuan hei hi phain thil an hre chiang lo niin an sawi.
Video thehdarhah chuan Shuafat-a sikul pakhata Israeli sipaite an thlen hian hmeichhe naupangte chu sikul pawnah uniform hain an inkuah hlawm tih a lang.
Sikul bangah thupek an tar a, “Zirna in kalpui emaw, zirturtu leh mi dang chhawr te, zirlai tawm ruktir emaw, zirlai luhtir emaw phal loh a ni,” a ti.
Unrwa chuan zirlai kum ruk atanga 15 inkar 550 chuang an awm lai a ni a, an staff pakhat hran a ni tih an sawi a. West Bank-a an director chuan ‘naupang tete tihthaihnana leh zirna an dawn theih loh phahna’ a nih thu a sawi.
Agency chuan East Jerusalem-a zirlai hawtirna dang sikul pathumah chuan Israeli police an duty bawk tih a sawi.
“Sikul luhchhuaha khar luihtir hi khawvel dan zah lohna lian tak a ni,” tiin Lazzarini chuan X-ah a tar lang a. “Heng sikulte hi engmah bawhchhe lova United Nations hnuaia din a ni,” a ti.
“Thla hmasa khan khar tura thupek chhuah a lo ni tawh a, Israeli thuneitute hian Palestinian naupangten zir tura dikna chanvo an neih chu an palzut a. Unrwa sikulte hi naupangte him nan hawn leh ngei tur a ni,” a ti.
West Bank hmun thenkhat thununtu, Palestinian Authority pawhin ‘naupangten zir tura dikna chanvo an neih palzutna’ tiin a sawi.
Jerusalem-a British consulate chuan UK, EU, Norway, Switzerland, Turkey leh Japan te chuan sikul khar hi na takin an dodal a, ‘zirlai, an nu leh pa leh zirtirtute lam an tang’ tih an sawi.
“Unrwa hian East Jerusalem-ah hian UN General Assembly-in phalna a pek angin kum 1950 atangin sikul an hawng tan a. Naupangten zirna an dawn theih nan khawvel dan angin Israel hian thil a kalpui tur a ni,” an ti.
Nikum khan Israel-a parliament chuan Israeli thuneitute leh Unrwa an inbiak lohna tur dan a siam a, Israeli ram chhunga hna an thawh pawh an phal lo.
Israel hian 1967 Middle East war khan East Jerusalem hi West Bank pum nen a la.
East Jerusalem hi kum 1980 atang khan a luah tan a, ram dangte erawh chuan an pawmpui lo va, khawpui pum hi an khawpuiah an chhal.
Palestinian-te chuan ram an neih huna an khawpui atan East Jerusalem hi an ti bawk a. Tunah hian Israeli 2,30,000 vel an cheng a, Palestinian 3,90,000 an cheng bawk.
Ram tam zawk chuan Israel-in West Bank-a awmna tur a siam chu dan lo an tihsak a, hei hi International Court of Justice (ICJ) pawhin a pawm dan a ni a, Israel erawh chuan hei hi a hnial ve thung.