Israel-in Gaza-a damdawi in pui ber a bei leh

Israel-in Gaza-a damdawi in pui ber a bei leh
Israeli-ten Gaza City-a damdawi in pui berah intensive care leh surgery department-te chu an tichhia niin Hamas-ten an sawi.
Online-a video thehdarhah chuan chhawng hniha sang Al-Ahli Baptist Hospital hi missile-in a fuh hnuah nasa taka kangin a khu hluah hluah a. Mi, thenkhat phei chu damdawi in khuma la mu malte chu an tlanchhe nasa hle.
Tual chhung chanchinbumi chuan Israel Defense Forces (IDF)-in doctor an phone a, insaseng turin a hrilh lawk niin a sawi.
Hamas chuan he beihna hi Israel ‘pawi khawihna rawng tak’ tiin a sawi a, report an thehlut dawn tih a sawi.
Thi leh hliam erawh an awm lo niin civil emergency service chuan a sawi.
Damdawi ina thawk tual chhung chanchinbumi chuan Israeli army officer-in emergency department-a mi a zai lai chu phone-a biain damdawi in chu rang taka chhuahsan turin a ti niin a sawi.
“Damlo leh awmna tur nei lova he hmuna awm khawm zawng zawngte hmun himah rang takin kal rawh se,” tiin officer hian a sawi.
“Minute 20 chauh hun in nei,” a ti bawk.
Social media-a video darhah chuan thawktu leh damlote chuan thim hnuaiah an chhuahsan hlawm tih a hmuh theih.
Naupang leh hmeichhia eng emaw zat telin, damdawi in bathlar vela tlanchhia awm khawmte pawh an tlanchhe tel.
Indona a chhuah hmaa damdawi in liam lem lo tak, Al-Ahli hi Gaza City-a Al-Shifa medical complex leh Strip hmar lama damdawi in dangte chhut chhiat a nih hnuah damdawi in lian ber a ni tawh.
Hamas kaihhruai sorkar chuan he beihna hi an dem thu an sawi a. Israel-in ‘Al-Ahli Hospital-a damlo leh thawktu tam tak an awm laia a bei hi pawi khawihna rawng tak’ a nih thu an sawi.
October, 2023 khan he damdawi in hi beih ni tawhin mi za chuang an lo thi tawh.
Palestinian thuneitute chuan Israeli-te tih thovah an puh a. Israel erawh chuan Palestinian Islamic Jihad hel pawl rocket kah kal sualin a fuh niin an sawi thung.
Israeli sipaiten Hamas chhut chimih tuma Gaza an beih hi October 7, 2023-a an rama luta Israeli 1,200 chuang an thah leh hren tura mi 251 an hruai phuba lakna kal zel a ni.
Israel sipaite che chhuah hnuah Gaza-ah hian mi 50,933 chuang an thi tawh niin Hamas enkawl health ministry chuan a chhinchhiah.
Inkahhai an kalpui zawk hnu, March 18 atanga inbeihna a awm thar leh hnuah mi 1,563 an thi leh tawh niin ministry chuan a sawi bawk.