Israel-in Gaza-a damdawi inah chanchinbu mi panga that

Israel-in Gaza-a damdawi inah chanchinbu mi panga that
Israeli-ten Gaza Strip chhim lama Nasser damdawi in an kahnaah mi 20 vel an thi a, an zingah hian ram dang chanchinbu tana thawk mi panga an tel niin Hamas hnuaia health ministry-in a sawi.
Chanchinbu mi palite hi Reuters, AP, Al Jazeera leh Middle East Eye-a thawkte nia sawi a ni.
Video thehdarhah chuan a hmasa zawkin damdawi in hi a fuh hnua chhanchhuah hna thawktute an awm laiin kah nawn leh a ni tih a lang.
Israel Defense Forces (IDF) chuan damdawi in beih hi an chhui nghal tih an sawi a. ‘Chanchinbu mite chu an tum ngai lo’ tih an insawi a, a bak an sawi thui lo.
October, 2023 atanga Gaza-a indona a chhuah hnuah tuna mite nen hian chanchinbu mi 200 dawn an thi tawh.
Chanchinbu zalenna atana beitu langsar, Committee to Protect Journalists (CPJ) chuan an chhinchhiah chinah Gaza-a indona hi chanchinbu mite thih tamna ber a nih thu an sawi a. Kum hnih chhunga he hmuna chanchinbu mi thah hi a hma kum thuma khawvel puma thah aiin an tam zawk tih an sawi.
Israel hian indo a chhuah atang khan Gaza Strip-ah hian ram dang mi chanchinbu mi luh a phal lo.
Thenkhat chu IDF-in an thununna hnuaiah an lut a; mahse, ram dang chanchinbute chuan a chhunga awm saten an sawi behchhanin thil thleng tam zawk an puang thin.
Thawhtannia thil thleng video darhah chuan Gaza chhim lama damdawi in lian ber pakhat luhna bula doctor dingin chanchinbu mite hmaa thisen kai kawr a tihlan laiin a vawi khat nan kah fuh a ni a. A puak thut a, darthlalang keh chum chum karah mipui an tlanchhia a, hliam tuar pakhat insaseng tuma lai pawh a lang.
al-Ghad TV-in thil thlen laia lak video a tihchhuahah chuan emergency worker-ten Nasser damdawi in chung a fuhna vela puih hna an thawh lai leh chanchinbu miten an en lai a lang bawk.
In chung panna kailawn, chanchinbu miten dinga Khan Younis vel an hmuh theihna lai pawh video-ah hian a lang a. Emergency worker leh chanchinbu mite awm lai hian khu leh chim a awm a, rang pakhat chu hmuh theihin a awm bawk.
Reuters news agency chuan cameraman, Husam al-Masri chu thi zingah a tel tih an sawi a. In chungah TV-a tihchhuah tur videi a lak laiin kah fuh a ni tih an sawi a. Reuters tana thlalatu, Hatem Khaled-a chu vawi hnih kahnaa hliam zingah a tel bawk tih a hmututen an sawi.
Associated Press chuan an tana thawk freelance journalist, Mariam Dagga-i a thi tih an sawi bawk a, kum 33 mi a ni.
Thi dangte hi Al Jazeera-a thawk Mohammad Salama, Middle East Eye freelancer Ahmed Abu Aziz leh photographer Moaz Abu Taha. US TV network NBC chuan Taha hi an hnuaia thawk a ni lo va, an thu lakna a nih thung erawh an sawi.
Hamas hnuaia Civil Defence chuan an mi pakhat a thi tih an sawi niin AFP news agency chuan a tar lang.
World Health Organization (WHO) hotupa pawhin an health worker pali an thi tih a sawi bawk.
Thawhtannia chanchinbu mi thah an nih hma chawlhkar hnihah khan Gaza City-a al-Shifa Hospital bulah Al Jazeera-a thawk pali telin chanchinbu mi paruk Israeli-ten an beihnaah an lo thi tawh.
Israel-in Gaza Strip a beih hi October 7, 2023-a Hamas-in an ram beia mi 1,200 chuang an thah leh hren tura mi 251 an hruai phuba an lakna niin indona a chhuah hnuah Palestinian 62,686 an thi tawh niin Gaza-a Hamas health ministry chuan a sawi.