Israel-in Gaza-ah puihna phur lorry panga luhtir

Israel-in Gaza-ah puihna phur lorry panga luhtir
Israeli sipai rorel khawl chuan chawlhkar 11 a dan hnuah naute chaw telin, mihring puihna tur phur UN lorry panga chu Gaza Strip-a luh an phalsak ta.
Prime Minister Benjamin Netanyahu-a chuan a thutlukna hi US Senate-a a thawhpuiten na taka an nawr hnuah Palestinian-a mi maktaduai 2.1-te ei tur ‘tlem tete zelin’ pe turin a ti tih a sawi.
“Tampui mitthi thlentir kan tum lo,” tiin Israel chet dan sawisel hlawh tak a chhan letna video chhuakah a sawi.
Netanyahu-a hian ei tur thawn luh chu UN-in a duh loh, US puihna nena Israeli sipai leh mi mal company-ten a sem darhna tur hmun an tihfel hnuah chauh a pangngaia kalpui an tum tih a sawi bawk.
Israeli sipaite chuan Gaza pum pui chu ‘thunun vek turin’ an beihpui thlak huang an tizauvin Pathianni atang khan Hamas lakah an che na sawt tih a sawi bawk.
Hetih lai hian Israeli thlawhnate chuan Thawhtanni khan hmun hrang hrang an kahnaah mi 40 vel a thi a, niin damdawi in leh thil hriate chuan an sawi.
Hmun khat an kah phei chu Gaza lailia sikul, Nuseirat refugee camp atana an hman niin baihvai chhungkuaten awm nana an hman a ni a, mi panga an thi.
Israeli sipaite erawh chuan ‘Hamas firfiakte’ tia sawiin heng lai vel hi command-and-control centre-ah an hmang niin an sawi.
Khan Younis chhim lam leh khawchhak lam daia awmte chu ‘hriat lawk loh beihna’ thleng thei avangin insasengsan turin an ti lawk bawk.
Israel hian March 2 atang khan Gaza-a puihna leh sumdawnna thil lut tur zawng zawng chu a dang vek, a hnu chawlhkar hnihah Hamas nena thla hnih an inkahhai a tawp rualin sipai chakna hmangin a bei zui leh bawk.
Kawngpui an dan hi hel pawlin mi an hren mek an chhuah theih nana an nawrna hmanrua niin an sawi.
Inkahhai tawp hnua Israeli-in tha a thawh lehah hian mi 3,000 chuang thi an awm leh tawh a, mi 4,00,000 vel baihvaiin an awm leh a. UN chuan kawng dan avang hian ei tur, damdawi leh tuialhthei a vâng tak zet tih a sawi bawk.
Kar hmasa khan Hamas hnuaia health ministry chuan chawlhkar 11 liam ta chhungin kham ei tur neih loh vangin naupang 57 an thi tih an sawi a. UN-in a puih Integrated Food Security Phase Classification (IPC) chuan mi maktaduai chanve vel an tam niin a chhut bawk.
UN chuan Israel hian khawvela mihring inenkawlna dan behchhanin Gaza-a chengte tan ei tur leh damdawi a pe lut ngei ngei tur a nih thu a sawi a. Israeli thuneitute erawh chuan engmah tlakchham a awm lo va, inkahhai chhungin lorry phur sang tel a lut hman niin an sawi a. Hamas-in hengte hi an ru niin an sawi a, hel pawl hian an pha thung.
Israel hi an thawhpuiten nasa takin an nawr a, Pathianni zan khan prime minister pisa chuan ‘Gaza Strip-ah tampui mitthi a thlen lohna turin mi chengte tan ei tur mamawh tawk luhtir a ni dawn’ tih a puang ta a ni.
Thawhtanni tlaiah khan Israeli military body Cogat chuan naute chaw telin puihna thil phur UN lorry panga chu Kerem Shalom crossing kaltlangin Gaza-ah an lut ta a ni.
UN leh tanpuitu pawl dang chuan Gaza luh inpeihin puihna thil phur lorry 8,900 chuang an awm reng tih an sawi a, miin an ruk loh nan mipui hnen a thlen ngei theihna turin ruahmanna pawh an nei tih an sawi.
October 7-a Hamas-in Israel luta mi 1,200 chuang an thah leh hren atana Gaza-a mi 251 an hruai hnuah Israel hian Gaza-a Hamas-te hi a bei zui a. Mi 53,475 thi an awm tawh a ni.