Russia leh Ukraine an inbe thuai dawn – Trump

Russia leh Ukraine an inbe thuai dawn – Trump
US President Donald Trump-a chuan Russian President Vladimir Putin-a nen phone-a darkar hnih an inbiak hnuaih Russia leh Ukraine ramten inkahhai puang tura indawrna chu ‘an kalpui vat dawn’ tih a sawi.
Trump-a hian an inbiakna chu ‘tha’ a tih thu sawiin muanna awmturin chu lehlam lehlam an indawr a ngaih thu a sawi.
Thil lawmawm lam sawi mah se Ukrainian President Volodymyr Zelensky-a nen pawha inbe tho, Trump-a hian inkahhai emaw, muanna atana inremna emaw chu hnai tak a ni lo tih a sawi bawk.
Putin-a chuan Ukraine nen ‘nakin zel atana inremna a awm theih nan’ indawr chu an inpeih reng tih a sawi a, hetih lai hian Zelensky-a chuan ‘hun chhinchhiahtlak’ a ni tih sawiin US chu inbiaknaah ralbang bik lo turin a ngen.
Russian president hian Putin-a nena an inbiakna a sawiah US leh European ramten ni 30 chhung intiamkamna awm lova inkahhai kalpui an nawr chungchang engmah a sawi lo.
Trump-a nena an inbiak hnuah Zelensky-a chuan Ukraine-in ‘a zavai leh intiamkamna awm lo inkahhai’ chu an duh a nih thu a sawi a, Moscow chu a inpeih ve lo a nih chuan ‘na zawka hrek’ a phut bawk.
Trump-a chuan Putin-a nen an inbiak hmain Zelensky-a hian thutlukna reng reng Ukraine tel lova siam a duh loh thu a sawi tih a sawi.
Russia atanga inkahhai puang tura phut chu chianga sawn lan ni lo mah se Russian-te atanga thil an dawn chu ‘anmahni thlirna atangin an thlir ve zel tur thu’ an sawi thung.
Truth Social page-ah an inbiak thu a tar lanah Trump-a chuan, “Russia leh Ukraine hian inkahhai atan indawrna an kalpui thuai dawn a, a pawimawh ber chu indo tihtawp a ni,” a ti a. Hei hi Zelensky-a pawh a hrilh nghal a, a hrilh lai hian ram dang hruaitute pawh an tel.
Zelensky-a chuan indawrnaah hian ‘American leh European aiawhte an tel ve zel’ a duh tih a sawi.
White House-a a hnua a sawiah Trump-a pawhin US chu Russia leh Ukraine indawrnaah an tel dawn tih a sawi ve bawk a; mahse, a rilru-ah ‘a tawpkhawk’ a thleng tawh a, na takin a nawr ve ve tih a sawi.
Muanna a awm theih nana indawrnaah US chu a ralbang dawn lo tih a sawi a. Tun hnaiah Trump-a hian Moscow leh Kyiv atanga muanna kawng zawh tura hmalakna a awm chak loh avangin kalsan mai a duh thu a lo sawi tawh a ni.
Russia chungchang bikah Putin-a pawhin indo chu tawk a ti a, indo tihtawp a duh nia a hriat thu a sawi.