Israel-in Gaza bei zui zel

Israel chuan Gaza a beihna chu nasa zual zawka kalpui zelin hetih lai hian UN human rights chuan Israel leh Hamas te chu war crime kalpui ve veah a puh.
UN Secretary General Antonio Guterres chuan Hamas te chuan mihringte chu phawah an hmang tiin a sawi a. Chuvang chuan Gaza-ah nunna chan an tam zual phah tia sawiin Gaza a nunna chan tam lutuk chu Israel military operation kalpui danah thil fel lo a awm ngei tih lanna a ti bawk.
Israel sipaite chuan hmar lam Gaza City atangin chhim lamah Palestinians 50,000 chuang an tlanchhe tawh tia sawiin Israel chuan Gazans te chu an him nana hmar lam pan turin a lo ti tawh a ni.
Head of the International Committee of the Red Cross’s Gaza office chuan Gaza chhim lamah ‘humanitarian catastrophe’ a thlen mek tiin a sawi a. Civilian te raipuar leh naupang pheikhawk pawh bun lo leh kum upate chuan sahimna leh ei tur leh tui thianghlim mamawhin an tlankhawm tiin a sawi bawk.
World Health Organization chuan Gaza Strip-ah natna inkaidarh theihna a sang hle tiin a sawi a, a chhan ber pawh tui thianghlim mamawh tawk awm lo leh Israel-in a bomb avanga hmun hima awmkhawm tam lutuk vang an ti.
Hetih lai hian medical supply phurtu convoy chuan Gaza City a damdawi in lian ber Al-Shifa a lut thung a.
Israel chuan Gaza hi 7 October a Hamas tena a beih thuta mi 1,400 chuang thata mi 200 chuang an hren hnuah a bei tan a ni.
Hamas te enkawl health ministry chuan Israel chetlakna avanga nunna chan 10,569 an tling tawh tiin a sawi a.
Hetih lai hian US Republican candidate chuan Israel a thlawp thu sawiin Hamas tena Gaza a inkahhaina an ngiat chu a thlawp loh thu a sawi thung.
Hetih lai hian Israel sipaite chuan northern Gaza-a civilian tam zawk te an luh theih nan kawng a hawn tur thu a sawi a. A hma pawhin Gazan te chu chhim lam atanga hmar lamah an sahim nana kal turin a lo ngen tawh a.
Gaza-a inbeihna a nasat laiin Israel luah chin leh mahse Palestinian Authority te enkawl West Bank lamah chuan tharumthawhna a hluar hle a. UN chuan West Bank ah hian Palestinian 150 chuang Israel in a tihlum tawh tiin a sawi.
Israel Defense Forces te chuan northern Gaza-a Jabalia-a Hamas outpost an thununa an lak tawh thu an sawi bawk a. He hmun thunun nan hian darkar 10 chuang inbeihna a thlen thu sawiin ralthuam tam tak manin firfiak te leiverh thahnem tak an hmuhchhuah thu an sawi bawk.