Israel-in Gaza City chhuahsan vek turin mi chengte a ti

Israel-in Gaza City chhuahsan vek turin mi chengte a ti
Israel chuan Gaza City-a chengte chu Hamas-in mi an la hrente an chhuah lohva an inpek bawk loh chuan khawpui chhuahsan vek turin a ti a, Gaza Strip-ah thlawhna leh lei lamah beihpui thlakin ‘hurricane ang maia nain’ an thawk dawn tih a sawi.
Thawhtanni khan Israeli sipaite hian Palestinian hel pawl hnenah hian kum 2023-a an ram an beih tuma an hruai, an la kawl mek 48 chu chhuah nghal turin an ti a ni.
Mi chengte chuan Israeli sipaiten Gaza City chu thlawhna atanga kapin khawlaia armoured vehicle chhiate chu an kap fuh nasa tih an sawi a. Hetih lai hian Hamas chuan Pathiannia US-in inkahhai puanna tura a rawt an dawn chu an zir chiang mek a hei hi President Donald Trump-a chuan hel pawl tan ‘an hun tha neih hnuhnung’ a nih tawh thu a sawi nghe nghe.
“Gaza (City)-a chengte hnenah hei hi ka sawi e: chhuak rawh u!” tiin Prime Minister Benjamin Netanyahu-a chuan a sawi a. Israel chuan tun hnaiah khawpuia ‘terror tower’ 50 an tihchhiat thu leh lei lama an beihna hmahruai a nih thu a sawi bawk.
“Vawiin hian hurricane na takin Gaza City van sang a tuam dawn a, terror tower-te a nghing dawn,” tiin Israeli Defence Minister Israel Katz chuan X-ah a tar lang bawk.
“Hei hi Gaza leh ram dang khualbuk changkanga awm a mi thattu leh pawngsualtu Hamas-te tana warning hnuhnung a ni: Mi hrente chhuahin in ralthuam tung rawh u – a nih loh chuan Gaza hi tihchhiat a ni ang a, in ral vek ang,” a ti.
Katz-a’n hetiang a tar lan hi Jerusalem-a bus stop-a Spanish pakhat tela mi paruk thah an nih hma lawk a ni a. A thattute hi Hamas chuan an fak zui.
Israel Defense Forces (IDF) chuan Thawhtanni khan Gaza City lailia in chhawng 12-a sang, baihvaia awm chhungkaw tam takin awm nana an hman chu chhuahsan tura an tih hnu darkar thum velah an kap chhe hle.
Thuchhuah a siamah IDF chuan he in chhawng hi Hamas helhovin ‘ralrelna leh puak thei an ruahmanna, indo chhunga IDF beihna an ruahmanna’ hmun a nih thu an sawi.
Israeli thuneitu pakhat chuan US-in inkahhai an rawtna thar berah hian Hamas chu an mi hren la dam leh thi tawh 48 chu inkahhai tan niah chhuah vek turin an ti a, hetih chhung hian indo tawpna tura indawrna kalpui a ni ang tih a sawi.
Hamas hian inremna tluantling a awm hma chu mi hren hi chhuah vek loh an tum ve thung a. Indona a tawp tih a chian hma hnu leh Israeli sipaite an inhnuhdawh chauhvin chhuah vek an tum.