Israel-in Gaza luhna a danin ni 60 tling ta

Israel-in Gaza luhna a danin ni 60 tling ta
Israel-in Gaza-a luhna a dan chuan ni 60 a tling ta a, mamawh a vâng tak zet tawh.
Gaza Strip-a ei tur, tui leh damdawi lut tur zawng zawng chu Israel hian inkahhai rawtna thar a neih hma, March 2 atang dang a, March 18 atang khan thlawhna atang leh lei lamah a beih chhunzawm zui a. October 7, 2023 atanga sipai chakna hmanga a beihah mi 52,000 chuang an thi tawh.
UN chuan Strip pumah hian ‘tampui mitthi’ a thleng dawn tih sawiin thiltitheitute chu ‘mihring chhiatna tawp’ a thlen hmaa che chhuak turin a ngen.
UN hnuaia World Food Programme chuan an chhang siamna zawng zawng an khar tawh a, Gaza-a an thil chhek sate chu a ral vek tawh tih a sawi.
UN Office for the Coordination of Humanitarian Affairs (OCHA)-in chuan indona avanga mihring baihvai tlanchhiate hian January atang tawh khan ei tur leh mamawh dang tam tak an mamawh khawp an hmu tawh lo tih an sawi.
Mi tam zawk chuan tuialhthei leh maida a vân em avangin ei tur an neih pawh an siam thei lo niin an sawi bawk.
Lo neitute leh ran vulhten hna an thawh theih loh avangin puihna an pek khawm ringin an khawsa a, mihring awm mek zinga 70% chu Israeli sipaiten ‘chet sawn phal lohna’ an tih huamah emaw, chhuahsan tura an tihna thupek karah emaw awm an ni hlawm tih an sawi bawk.
Gaza-a soup siamna hmun la inhawngte pawhin rei lo teah an inkhar a ngai tawh dawn niin an sawi.
Puihna engmah a luh loh avangin chhungkaw tam tak chuan ‘an hmuh theih ang ang’ an ei niin UN agency for Palestinians, UNRWA chuan a sawi.
WFP thupuangtu chuan Al Jazeera Arabic hnenah ‘puihna thil phur truck-te chu Gaza-a luh theih hun nghakin an la awm,” tih a hrilh.
NGO Mercy Corps chuan thil man pawh 500% chuangin a sang tawh a, ramri hi hawn a nih loh chuan Gaza-a ei tur awm ang ang chu a zo vek dawn tih an sawi bawk.
Tam viltu, Integrated Food Security Phase Classification (IPC) chuan Gaza-a ei tur awm lo leh kham ei tur awm lo hi a zir chiang a. April 28 atanga chawlhkar khat chhung an zir.
IPC hian Gaza an hrek avang hian Israel hi warning pawh vawi li vel a lo pe tawh a. Damdawi in chu damlo leh hliamin an khat a, damdawi an neih si loh avangin tam tak an thi.