Israel-in Gaza sikulah Palestinian baihvah 10 that

Israel-in Gaza sikulah Palestinian baihvah 10 that
Israel-ten thlawhna atanga Palestinian baihvaite awmna sikul an beihnaah mi 10 an thi a, mi eng emaw zatin hliam an tuar niin damdawi thiamten an sawi a. US-in rawt anga Gaza-a inkahhai mek laia tharum thawhna thleng thar ber a ni.
An kah hma hian Palestinian thenkhat chu Israel thlawp hel pawlte nen an inkap a, mi thenkhat ruk bo tumin sikul hi an bei niin an sawi niin damdawia thawk leh mi chengten an sawi.
Gaza Strip-a Maghazi refugee camp chhak lamah Israel drone-in missile pahnih an kap a, mi 10 an thi a, eng emaw zat hliam niin an sawi bawk.
Heng beihna thlengah hian civil mi engzat nge thi tih chian a la ni lo va, Palestinian baihvaite awmna hmun hnai taka thleng ve ve a ni.
A hmutu pakhat, Ahmed al-Maghazi chuan an hmun hi Israel sipaite thununna bula awm a ni a, Israel thlawp helten an bei a, Palestinian-te hian inven nan an kap leh ve niin a sawi.
Thawhtanni tlai khan Israel thlawp hel zinga pakhat hruaitu chuan video hmangin Hamas member panga vel an that thu a puang a. Hamas chuan engmah an la sawi ve lo.
Thawhtanni vek khan Israeli thlawhnain a kahah Gaza City-ah motor bike-a chuang Palestinian pakhat a thi a, naupang pakhat a hliam bawk niin damdawi thiamten an sawi.
Israeli sipaite hian Gaza lailia lirthei an kahnaah Palestinian dang a thi bawk tih sawiin Thawhtannia thi chu mi 12 an tling niin an sawi.
Kum 2007 atanga Gaza enkawltu, Palestinian pawl, Hamas leh Israel hian October thla khan inkahhai an puang a, bawhchhiatna erawh a thleng nasa hle.
Gaza health ministry chuan inkahhai puan hnua Israel-te beihna avangin mi 700 vel an thi tawh niin a sawi a. Israel pawhin Gaza-a firfiakten sipai pali an that tawh tih a sawi ve bawk.
Pathianni khan Hamas sipai pawl chuan Israel-in inkahhai rawttu, US President Donald Trump-a rawt anga inkahhai thawh khatnaa an tih tur an hlen hma chu ralthuam dah an tum loh thu an lo sawi tawh.
October 7, 2023-a Hamas-in Israel an beiha mi 1,200 vel an thah leh hren tura mi 251 an hruai hnuah indona hi a chhuak a. Israel-in phuba lak nana Gaza a beihnaah Palestinian 72,000 chuang an thi tawh a, a tam zawk chu civil mi an ni tih health ministry chuan a sawi.