Israel-in hmaichhanah Lebanon biak tum

Israel-in hmaichhanah Lebanon biak tum
Middle East-a indona kal mek a chhuah hnua Lebanon a beih nasat ber thlena mi 300 chuang an thih hnu leh Donald Trump-a’n US-Iran inkahhai a puan hnu ni khatah Israeli Prime Minister Benjamin Netanyahu-a Beirut nen hmaichhana inbiakna a tum thu a sawi.
Trump-a hian Thawhlehni tlai khan Iran chhut chimit vek tuma vauna a tihchhuah hnu lawkah chawlhkar ruk chhung indonaah inkahhai a puang.
Pakistan-ah chuan thuneitute chu US leh Iran inbiak vawi khatna thleng turin an inbuatsaih a, an khawpui, Islamabad hmun thenkhat chu kharkhip a ni.
Netanyahu-a hian thla hmasa khan Lebanon nena hmaichhana inbe tura a rawtna chu a lo hnawlsak tawh a. Ningania thuchhuah a siamah erawh remna zawnga inbe thuai turin thupek a tichhuak tih a sawi a, hei hian Iran nena inzawm Hezbollah-in ralthuam an lek tihtawp pawh a huam tel dawn.
“Lebanon-in Israel nena hmaichhana indawr tura a ngen nawn fo avangin nimin khan cabinet hnenah inbe thuai turin ka hriattir a ni,” a ti a. “Hezbollah-in ralthuam an dahna tur leh Israel leh Lebanon inkara remna zawnga inlaichinna siam a ni ang,” a ti bawk.
Netanyahu-a thusawi hma darkar khatah Lebanon President Joseph Aoun-a chuan he thil chungchangah hian palaiten hma an la mek tih a sawi ve bawk a, ram dangte pawhin ‘a lawmawm zawngin thil a kal’ niin an ngai.
Lebanon-a thuneitu sang pakhat chuan Israel nena inbiakna huam zau zawk a awm theih nan an ram sorkar chuan tun hnai ni eng emaw zat chu inkahhai a nih theih nan hma a la niin Reuters a hrilh a, hmalakna chu US-Iran inkahhai nana inbiakna nen ‘thil hrang; mahse, kalphung thuhmun’ a nih thu a sawi bawk.
Israel chuan Lebanon-a beihpui a thlak mek chu tihtlem tumin a inbuatsaih mek niin thuneitu sang pakhatin Ningani khan a sawi a. Israeli thuneitu dang pakhat pawhin Lebanon nena inbiakna hi karleh hian Washington-ah tan a nih rinawm tih a sawi bawk.
November, 2024-a US-in a rawt anga inkahhai a awm hnuah Israel leh Hezbollah inkarah hian kum khat chuang zet indona a titawp hman a. He inremnaah hian Lebanon chuan sorkar hnuaia venhim hna thawktute chauhvin ralthuam an keng tur a ni tih chu a pawm a, Hezbollah-te chu an ralthuam an dah vek a ngai tihna a ni.
Hezbollah-in ralthuam an dah vek theihna tura Lebanene sipaiten hma an lakna erawh a hlawhtling ta lo va, sipaite pawhin an tum tak tak chiah lo niin Israel chuan a sawi.
US-Iran inkara inkahhai puan a nih hnuah U.S. Brent crude man chu nasa takin a tlahniam a, Israel-in hmaichhana Lebanon nen inbiak tur a puan leh hnuah $4-in a tlahniam leh bawk.
Hezbollah hian US leh Israel tang dunin February thla tawp atanga Iran an beiha Supreme Leader Ayatollah Khamenei-a thah a nih hnuah phuba lak nan Israel lamah rocket an chhuak tan a. Hei hi Tel Aviv chuan chhang ve nghalin Middle East indonaa inbeihna thlen nasatna ber hmunah a chang zui ta hial a ni.
Thawhlehni khan US leh Iran chuan chawlhkar ruk atan inkahhai an puang a, Washington leh Israel chuan inkahhai hian Lebanon-a inbeihna a huam ve lo niin an sawi thung.