Israel-in ‘mahnia din’ ngam ngat

United States-in Israel chu Gaza run lo tura nawra a runlui a nih chuan ralthuam pek chhunzawm loha a vau hnuah Israel prime minister Benjamin Netanyahu chuan Israel chu ‘amhin a ding thei’ tiin a sawi.
“A tul a nih chuan mahni chauh pawhin kan ding mai ang. Ka sawi tawh angin a tul chuan kan kut-tin nen chauh pawh kan bei mai ang,” tiin a sawi.
US President Joe Biden chuan Rafah chu Isreal-in a runlui a nih chuan ralthuam thenkhatte Israel hnena a pek thin chu a tihtawp tur thu a lo sawi tawh a ni.
US chuan Israel hnenah hian Rafah beiha civilian nunna chan an pun nasat hlauhna avangin ralthuam a pek tura tihdiam tawh pawh a thawn duh rih lo bawk.
Mahse Netanyahu thung chuan US ngenna a hnawlnaah kum 1948 indona chu sawi lang thungin, “Kum 76 kaltaa War of Independence-ah khan mi tam tak dotu mi tlemte chauh kan ni” a ti a. “Ralthuam tha pawh kan nei lo va. Israel hnena ralthuam pek khap a ni a, mahse, huaisenna leh inlungrualna nen hnehtu kan ni tho,” tiin a sawi.
Biden-an ralthuam pek a thulh a nih pawhin Israel chuan ‘kan kuttin mai ni lo kan nei’ tia sawi bawkin, “Pathian puihna in kan spirit chak tan nen lungrualin hnehna kan chang ang” tiin a sawi bawk.
Yoav Gallant, Netanyahu defence minister pawhin Israel ‘hmelma leh thianthate pawhin an hriat tur chu an ram chu namnul chi a ni lo’ tia sawiin, “Nghet takin kan ding ang a, kan tum kan hlen ang” a ti bawk.
Hetih lai hian UN chuan Thawhtanni atang khan mi 80,000 chuangin Rafah an chhuahsan tawh tiin a sawi a, Israel chuan Rafah chu bomb rengin a tank te pawhin an hnaih tial tial a ni.
UN chuan Rafah khawpuia cheng mi maktaduai chuangte chuan eitur leh intur an tlachham mek tia sawiin a chhan ber pawh a bul hnai luhna atangin engmah dawn thar an nei lo a ti bawk.
Israel sipaite chuan Rafah a Hamas te lakah ‘targetted strike’ an kalpui reng thu sawiin mahse sipai chakna hmang em chuan a la luhchhuah lo thung a ni.
Nilaini khan Biden chuan CNN ten an kawmnaah American bomb te chu Palestinian civilian te thah nana hman a ni a ti a. “Rafah an luhchilh a nih chuan Rafah beih nana an hman tawh thin ralthuam te chu kan pe chhunzawm dawn tawh lo,” tiin a sawi a ni.
White House national security spokesman John Kirby pawhin Biden chuan Rafah luhchhuah ringawt chuan Israel thiltum Hamas te nuaichimih chu a thlen dawn tihnaah a ngai lo a ti bawk a. “Chhel taka Hamas te nuaibo Israel te thiltum a ni a, chu erawh kan tawmpui a ni” tiin Kirby chuan a sawi bawk a.
Hetih lai hian inremna a awm theih nana inbiakna chuan rah tha a chhuah hmel loha ngaih a ni a. Ningani khan Israeli leh Hamas palai te chuan Cairo an chhuahsan ve ve tawh a ni.
Gaza indona-in thlasarih hmel a hmuh tawh hnuah Israel chuan Rafah khawpui a lak hma chuan hnehna changah a inngai dawn lo a ti a, Rafah khawpui hi Hamas battalion la awm chhun te inkulhna a ni.
Israel chuan Hamas tena 7 October 2023 a southern Israel beithuta mi 1,200 chuang tihluma lung in tang mi 250 chuang an lak hnuah Gaza chu a bei zui ta a ni.
Israel hmalakna avang hian mi 34,900 chuangin nunna an chan tawh niin Hamas-run health ministry chuan a tarlang a. Mahse, civilian thi leh Hamas thi a thliarhrang lo thung.