Israel-in na zawka Hamas beihna tur ruahmanna pawm

Israel-in na zawka Hamas beihna tur ruahmanna pawm
Israel-a security cabinet chuan sipai chakna hmanga Hamas an beih chu na zawka kalpui tumna an pawm a, hei hian Gaza lak leh an ram awp zui pawh a tel tih Israeli thuneituin a sawi.
Prime Minister Benjamin Netanyahu-a chuan cabinet hian Hamas chhu chimit tura ‘na taka beihpui thlak’ leh mi an hrente chhuah vek an tum tih a sawi a, Gaza-a mi maktaduai 2.1 chengte chu ‘sawna hum’ an tum bawk tih a sawi.
Sipaite hian eng anga zau nge an lak dawn a sawi lo va, ‘an lut lo vang a, an chhuak ang’ tih a sawi.
Cabinet hian a thuphungin mi mal company-te kaltlanga puihna luhtir pawh an remti a, thla hnih lai kawngpui an dan tawh, UN-in ei tur vang lutuk tawh tia sawi chu a tawp theih beisei a ni.
UN leh mi tanpuitu pawlte chuan ruahmanna hi mihring nun dan phung palzutna a nih thu leh an thawhpui dawn loh thu an sawi.
Hamas hotu sang chuan an pawl chuan Israel-in ‘a nawrna leh a bumna’ chu an hnawl tih a sawi.
Israel-a security cabinet hi Pathianni zan khan inkahhai avanga thla hnih an chawlhsan hnuah March 18 atanga Gaza an beih thar leh mek chungchang sawiin an thukhawm.
Thawhtanni tuk khan Israeli thuneitu sang chuan minister-te chuan Israeli sipai hotu, Chief of Staff Lt Gen Eyal Zamir-a’n ‘Gaza-a Hamas hneh leh mi hren lak kir’ nana rawtna a neih chu an pawm vek tih a sawi.
“Ruahmannaah hian Strip lak leh awp zui te, Gazan mipuite chu an him nana chhim lama suan te, Hamas-in puihna thil an sem theihna tur siamsak loh te leh na taka Hamas beih te a tel,” a ti.
Israeli chanchanbute chuan thawh khatnaah hian Gaza zau zawk lak leh Israeli-ten ramri hrula ‘buffer zone’ an siam zauh a tel tih an tar lang.
A hnuah Israeli venhimna hotu sang chuan ruahmanna hi US President Donald Trump-a’n May 13 leh 16 inkara a tlawh hma chuan an kalpui dawn lo tih a sawi a, hei hi Hamas tan inkahhai tihtharna tur leh an mi hren an chhuahna tura ‘hun remchang inhawng’ a nih thu a sawi.
Finance Minister Bezalel Smotrich-a chuan Thawhtanni khan thuthar lakhawmtute a kawmnaah Israel hian ‘a tawpa tawpah chuan Gaza Strip luah a tum ta’ tih a sawi niin Reuters news agency chuan a tar lang.
Israel hian Gaza hi 1967 Middle East indo khan West Bank nen a luah a. Kum 2005 khan Gaza atangin a sipai leh a mite a chhuahtir a; mahse, UN chuan Gaza hi Israeli-ten ramri, a chung boruak leh vaukam an la thunun avangin an la luahah a chhiar.
Israel-in thapui thawh thar a tum leh mek lai hian Gaza-a mi hren 59, mi 24 la dam nia hriatte la kir tura sipai chakna hmanga a beihna chu mi tam tak chuan hlawhchhamah an ngai thung.
Hamas enkawl health ministry chuan mi 52,567 an thi tawh niin an sawi a, heng zinga 2,459 hi Israeli-ten beihpui an thlak thar leh hnuah a nih thu an sawi bawk.