Israel-in Palestinian a chhuah tur a titawp

Israel-in Palestinian a chhuah tur a titawp
Israel chuan Palestinian mi lung ina an dah 600 chuang chhuah a tum chu a titawp rih tih a puang a, inkahhai puan mekah thil kal pangngai lo a awm leh phah.
Benjamin Netanyahu chuan Hamas-in mi an hren mek an chhuah leh hma chu tihkhawtlai a ni dawn tih a sawi a ni.
Israeli prime minister-in hetiang a sawi hma, Inrinni khan Hamas chuan Israeli an hren paruk an chhuah a, heng zinga pali hi October 7, 2023-a Israel an beih tuma an hruai an ni.
Hamas nena inkahhai an puan meka thawh khatna chhungah hian mi hren chhuah hun tum khat chauh a awm tawh a, hetah chhuah tur zingah hian an tannaa thi pali pawh an tel dawn.
Nung dama la awmte chhuah tur engmah sawi a la awm lo va, inkahhai thawh hnihna pawh puan a la ni chuang lo.
Palai hna thawktute chuan ruahman lawk anga thil a kal theihna turin rim takin an thawk mek bawk.
Netanyahu chuan Hamas-te chu ‘inkahhai bawhchhiaah a puh nawn leh’ a, an mi hrente chu ‘an thuthlung puanna remchang atan an hmang’ niin a puh.
Hamas hotu, Izzat al-Rishq chuan Pathianni tukah khan Palestinian mi tang chhuah hun sawn chu a dem tak zet tih a sawi ve thung.
Israel-in mi hren chhuahte chhuahtir dan chu insawisakna tia a sawi chu a dik lo hulhual niin a sawi a, inkahhai inremna anga thil kalpui loh engmah an nei lo niin a sawi.
Netanyahu-a hian October 7-a an ram beih a nih tuma hruai – Tal Shoham, Omer Shem Tov, Eliya Cohen leh Omer Wenkert te chhuah an nih hnu, Inrinni khan an lam atanga lung in tang chhuah tur tihkhawtlai hi a puang.
Inrinnia Hamas-te chhuah zinga pahnih, Avera Mengistu leh Hisham al-Sayed te hi kum tam tak Gaza-a lo hren tawh niin Mengistu-a hi kum 2014 leh al-Sayed-a hi kum 2015 atanga hren a ni.
Israeli mi hren chhuah takte hi inkahhai thawh khatnaa chhuah tur la dam lai hnuhnung ber an ni tawh a, inkahhai thawh khatna hi Inrinni lo awm tura tawp tur a ni.
Israel-in a mi tang chhuah a tihkhawtlai mek lai hian an awp chin West Bank-a Ofer Prison tualah chhuah tura tih chhungkua leh thianten hmuakin an lo awm khawm tawh.
Chhuah an nih tak loh hnu, Inrinni tlai khan Hamas chuan Israel hian inremna an bawhchhia tiin a puang zui.
Palestinian thuneitute chuan Inrinnia chhuah tur zinga 50 chu dam chhung tang tura hrem an ni a, 60 dang chu rei tak tang tur niin mi dang 445 erawh Israel-in October 7 hnua a man an ni tih an sawi.
Hamas hian October 7, 2023-a Israel a rûn tuma hren tura a hruai zinga mi 62 an la kawl a, a zahve aia tam hi la dam nia hriat an ni.
Hamas hian inkahhai puan angin January 19 atang khan Red Cross kutah a hlan a tahtawlin a chhuah a, Israel-in Palestinian mi tang a chhuah ve zel bawk.
Hamas-ten chhuah dan hian an sipaiten ralthuam nen an chhawm a, dawhsanah pho langin an miten nasa takin an bawr a, chumi hnuah an hlan chauh thin.
Tel Aviv-a Hostages Square-ah hei hi vantlangin an lo en ve thin a, an tih dan vel chu Israeli sorkarin tha a ti lo hle a ni.
Tar lan tawh thin angin Hamas-in Israel a beih tum khan mi 1,200 chuang, a tam ber civil mi an thah bakah mi 251 chu hren turin Gaza-ah an hruai.
Israel chuan sipai chakna hmanga chhang letin Hamas a bei nghal a, Palestinian 48,319 vel, a tam ber civil mi an thi tawh a ni.