Pope Francis-a dinhmun a la tha thei lo

Pope Francis-a dinhmun a la tha thei lo
Pope Francis chu Inrinnia a dinhmun a la tha lo hle tih puan a nih hnuah zan chu hahdam taka hmangin a hahchawlh niin Vatican chuan Pathianni tuk khan a puang.
Pontiff hi Zirtawpni ai kha chuan ‘a hniam’ tiin Inrinni khan sawi niin thawhah kaihhnawh thawk harsa a neih avangin enkawl a ni a, thisen pawh pek a ni.
Kum 88 mi Rome-a Gemelli Hospital-ah enkawl niin a chuap pahnihah pneumonia hmuh ve ve a ni.
Anaemia-in a ken tel, a thisenah platelet a tlem avangin thisen pek hi a ngai tih Vatican chuan a sawi.
Roman Catholic hruaitu hian engkim a hria a, thutthleng ban neiah a thu thei a; mahse, oxygen a mamawh tam hle tih an sawi.
“Holy Father dinhmun hi a la tha lo hle,” an ti a. “Pope hi a dinhmun hlauhawm lo tak a ni thei rih lo,” an ti bawk.
“Holy Father hian engkim a la hria a, nilengin a thutnaah a la thu thei a, a hma ni ai erawh chuan a hniam,” an ti.
Pope hian a dinhmun hi puan zel tha a tih zawk avangin Vatican pawhin ni tin a puang a. An puan dan leh a thui zawng erawh a danglam zing hle a, a chang chuan a dinhmun ngaichangtute uluk taka an ngaihthlak leh chhiar a ngai thin.
Inrinnia a hniam tih puan a nih hma lawk khan doctor-te enkawlna chu Pope hian a thatpui nia puan a lo ni tawh a. Zirtawpniah khan a hniam leh hret tih puan a ni a, Inrinniah puan zui leh a ni bawk.
Pope hi February 14 khan ni eng emaw zat a thawk lamah harsatna a neih avangin damdawi inah dah luh a ni.
A chuapah pleurisy a insiam a, amah hi kum 21 a nih laiin a chuap pakhat zawk eng emaw zat hi paih a lo ni tawh.
Roman Catholic kohhran hotu ber a nih chhung 12 liam tawhah Argentine hi damdawi inah a lut fo tawh a, March, 2023 pawh khan bronchitis avangin zan thum a awm.
Tun tuma a damlo hian khawvel puma Catholic-te a tichiai hle a, a dinhmun an ngaichang thup.
Kumin hi an kohhran Jubilee kum niin Rome tlawhtu an tam lehzual bakah Pope pawhin hun hmanna tur a ngah lehzual kum a ni.
A tih tur a ti thei lo dawn em tih hriat a la ni rih l va, damdawi inah hian a doctor-te chuan kar tir lam khan chapel-a tawngtai turin a la kal tih an sawi a, lehkha pawh a la chhiar niin ans awi.
Pathianni hma khan Vatican chuan vantlang tawngtai a hruai thei tawh lo tih an sawi a, tun Pathianni nen a zawnin a inlan ta lo.
Amah duhsaktute chuan Gemelli tualah bati an chhi a pangpar an dah a, a dam leh thuai nana duhsakna lehkha an dah bawk a. Inrinni tlai khan Vatican-a St Peter’s Basilica-ah chuan thil danglam a awm hran chuang lo va, mipui erawh an pungkhawm lo.