Israel-in puihna dawn tum Palestinian tam tak that

Israel-in puihna dawn tum Palestinian tam tak that
Gaza-a tanpuina sem dawn tum Palestinian thahnem tak thah an ni tih damdawi in thuneituten an sawi.
Damdawi in pahnih chuan Gaza lailia Israeli sipaite awmna lai, Natzarim corridor an tihah US leh Israel-in an thlawp Gaza Humanitarian Foundation (GHF) thil semna hmuna chhangphut leh ei tur phur lirthei inzuite bulah Thawhlehni zan khan mi 25 thah an ni tih an sawi.
Hamas hnuaia Civil Defence agency chuan Israeli sipaiten silai an hmet puak a, sawi dan thenkhatah lorry-te hian mihring an su a, Palestinian-te pawhin an kap nia tar lan a ni a. Israeli sipaite chuan anmahni pantu mi rinhlelhawmte tihthaih nan chauh silai hi an hmet puak niin an sawi.
Rafah-a GHF hmun bul lawkah Israeli-te silai hmeh puahah mi dang paruk an thi bawk niin chhim lam, Khan Younis-a Nasser damdawi inin a sawi.
Israeli sipaite chuan Rafah-a thil thleng hi report an ngaichang mek tih Nilaini tlai khan an sawi.
GHF chuan Nilaini khan Rafah leh Gaza lailia an distribution centre pathumah ei tur parcel 43,000 chuang ‘engmah tihbuaina awm lovin’ an sem tih an sawi.
Hetih lai hian May 26 atanga tanpuina sem dan thar an kalpui atangin ni tin GHF hmun bul velah tharum thawhna leh buaina a la thleng deuh ziah.
Gaza-a Hamas health ministry chuan chawlhkar hnih liam ta chhung khan puihna thil semna hmun pantu mi 223 thah an nih tawh thu leh mi 1,858-in hliam an tuar niin an sawi.
GHF hian US private security contractor-te chhawrin UN-in Gaza-a mi cheng maktaduai 2.1-te puihna an kalpui thin thlakna atana tih a ni.
UN leh tanpuitu pawl dangte chuan an thawhpui duh lo va, mihring inpuihna kawngah a lai lo va, a huam a zim a, anmahnia tih tumna vek a awm tiin an tha an ti lo.
Israel-in thla thum dawn Gaza luhna a dan hnuah mipuite hi an tam tak zet tawh a, chawlhkar thum liam taa tlem luh phal leh tawh mah se an mamawh a la phuhru lo nasa niin an sawi bawk.
US leh Israel erawh chuan GHF-in puihna an sem dan hi Hamas-in puihna thil an ruk tur danna kawng niin a sawi a. UN chuan hei hi thil buaithlak tak a nih lem loh thu an sawi a, Hamas-in an ruk ngai loh thu an sawi ve bawk.
Tar lan tawh thin angin October 7, 2023-a Hamas-in Israel beia mi 1,200 chuang an thah leh hren tura mi 251 an hruai hnuah Israeli sipaite chuan an awmna, Gaza hi an bei zui.
Tun thlengin Gaza-a Hamas health ministry chuan mi 55,104 an thi tawh niin an sawi.