Israel-in Yemen-a tumhmun lian ber che thei lovin siam

Israel-in Yemen-a tumhmun lian ber che thei lovin siam
Israeli sipaite chuan Yemen-a thlawhna tumhmun lian ber, an khawpui, Sanaa-a mi, Houthi-ten an thunun chu ‘che thei lo’ a nih tawh thu a sawi.
Thawhlehnia an beihnaah civil mi thlawhna pathum, departures hall, tlankawng leh military air base leh tumhmun thil pawimawh tam tak tihchhiat a nih thu Reuters news agency chuan a tar lang a. Houthi-te chuan mi pathum an thi tih sawiin phuba an lak tur thu an sawi.
Ni hnih liam ta maiah khan Iran-in a puih Houthi-te hian missile-in kapin Israel-a thlawhna tumhmun lian ber bulah a tla a, rei vak lo chhung khar a ngaih phah.
Thawhtanni khan Israel chuan phuba lak nan Yemeni lawngchawlhna khawpui, Hudaydah an kap tawh.
Israel hian vawi eng emaw zat Yemen-a Houthi hi a bei tawh a, heng zingah hian January-a power plant leh lawngchawlhna a kahte pawh a tel a. December khan Sanaa-a thlawhna tumhmun pawh a kap.
Israel Defense Forces (IDF) chuan ‘thlawhna tlankawng, thlawhna leh tumhmuna thil ding dang’ an beih thu an puang a. Houthi-ten he tumhmun hi ‘hmanrua leh an mite’ phurh kual nan an hmang niin an sawi.
IDF hian Sanaa-a power station-te pawh an kap a, hei hi Houthi-te hman ‘electricity supply hmun pawimawh’ a nih thu an sawi a, hmar lama al-Imran cement factory pawh an kap tih an sawi.
Houthi-te hian Israeli-te ‘beihna chu chhan let lohvin a awm dawn lo va, Yemen hian he thil avang hian Gaza a thlawpna a hnuhkir phah dawn lo’ tih an sawi.
Thawhtannia Hudaydah beihnaah hian cement factory hrang hrang kah a ni bawk.
Aden dawta Red Sea-a lawngchawlhna lian ber dawttu a ni a, Yemen-in ei tur a lak luh 80% chuang phurh luhna a ni.
Thawhtannia beihna an tawhah hian mi pali vel thiin mi dang 35-in hliam an tuar niin Houthi chuan an sawi.
An pawl hian US leh Israel tihah an puh kawp a, US defence thuneitu erawh chuan inrawlhna an nei lo tih AFP news agency hnenah a sawi thung.
Houthi hian Pathianni tuk khan Tel Aviv-a Ben Gurion Airport hawia missile kapin terminal pui ber bula kawngah a tla a. Mi paruk an hliam niin Israeli emergency services chuan a sawi.
Israeli Prime Minister Benjamin Netanyahu-a chuan Houthi-in an tumhmun an beihna an chhan let tur thu hi sawi nghalin, “Kan lo bei tawh thin a, kan la bei leh bawk ang,” a ti.