Israel-Iran inbei zel, US-in tel ve hnaih hret hret?

Israel-Iran inbei zel, US-in tel ve hnaih hret hret?
Middle East ram hnih, Israel leh Iran chu Ningani tuk a her chhuahah pawh inbei chhunzawm zelin ni sarihna a kai ta a. Hetih lai hian US hotu sangte chuan Tehran hi an bei ve dawn niin an sawi nia tar lan a ni bawk.
Israeli sipaite chuan Nilaini zan tlai tawh takah khan Iran-in missile-a ankah avangin an ram pumah siren an tiri tih an sawi a. Tehran-in drone a thlawhtir tam tak an dangchat tih an sawi bawk.
Israeli Defense Forces (IDF) thupuangtu chuan Iranian khawpui chu ‘tha tharin’ drone hmanga an beih thu a sawi bawk a. Tehran hnaiha khaw pahnih, Arak leh Khondab-a chengte chu an bula ‘sipai hmun’ an kah dawn avangin insaseng turin a ngen bawk.
Israel leh Iran inkara inbeihna nasa ber tling tawh hi Zirtawpnia kal taa Israeli sipaiten ‘Operation Rising Lion’ tia bul an tan kha niin Iranian khawpui liante an kap a, Tehran-in nuclear ralthuam siam a tum tihtawp nana an tih niin an sawi.
Indona kal mekah hian mi 250 chuang thi tawhin heng zinga 220 chuang chu Iran-a mite an ni.
Israeli Prime Minister Benjamin Netanyahu-a chuan Nilaini zanah khan Israel tana hlauhawm thei thil pahnih chu an la kiang ta niin a sawi a, hei hi nuclear leh ballistic missile a ni a. “Heng hlauhawm ni theite hi a tahtawp zelin kan la kiang a ni,” tiin video-a thuchah a sawiah a puang.
Netanyahu-a hian Israeli sipaiten ‘Tehkan chung van boruak an thunun’ niin a sawi bawk a. “Ayatollah-te lalna ram chu na takin an chhu a. Nuclear bunna te, missile, command center leh an lal ram chhinchhiahnate kah a ni,” a ti.
Israeli prime minister hian ‘Israel thian tha’ tia a sawi, US President Donald Trump-a chungah Israel lama a tan avang leh ‘van sang atanga beihna’ laka invennaa a puih avangin lawm thu a hrilh bawk.
“Kan inbe reng a, nizanah pawh kan inbia a. Tha takin kan titi a, min thlawp avangin President Trump-a chungah ka lawm a ni,” a ti.
Trump-a hian sipai chakna hmangin Israel-in Iran a beih mekna hi a pui dawn em tia zawhna chu a sawi chiang duh lo va. “Ka ti mai thei, ti lo mai thei bawk. Tu mahin ka chet dan tur hi an hre lo,” tiin White House tuala thuthar lakhawmtuten an zawhna a chhang.
Hetih lai hian Bloomberg News chuan US hotu liante chuan Iran hi an bei dawn niin Nilaini khan a tar lang a. Thil a inthial mek a, a inthlak thut thei reng tih an sawi niin a tar lang a. An zinga thenkhat phei chuan kartawpah hian an che dawn niin an sawi bawk niin Bloomberg hian a tar lang.
Iranian Supreme Leader Ayatollah Ali Khamenei-a chuan Nilaini khan Trump-a chu inpe mai tura a tihna chhangin an inpek dawn loh thu a sawi.
“US president hian min vau a. Tawngkam dengkhawng leh na takin Iranian mipuite chu a hmaa inpe turin min ti a. Vau hlaute chauh vau rawh se, Iranian ram hi heng vauna hi min tihlau ve lo,” tiin Israel-in an rap a kah tan atanga a vawi khat nana television-a thuchah a sawi tihchhuah hmasak berah a sawi.
Khamenei-a hian ‘indonaa’ US a tel ve tur chu zaa za ‘anmahni thu’ a nih thu a sawi bawk a. “An tana chhiatna thleng tur chu Iran an chhutna aia nasa fe a ni ang. Sipai chakna nena a lo inrawlh ve a nih chuan US-in na a tawrh tur chu thil dang nena khaikhin phak rual loh a ni ang,” a ti bawk.