Israel leh Hamas ten indo titawp turin inremna an siam ta

Israel leh Hamas ten indo titawp turin inremna an siam ta
Israel leh Hamas chuan rei tak nghah tawh inkahhai leh mi hrente chhuahna turin inremna an siam ta a, a thawh khatna hi mi 67,000 chuang thih tawhna Gaza indona tihtawpna tur leh Middle East hmelhmang thlakna tura US President Donald Trump-a rawt anga kalpui turin an inrem.
Hamas-in Israel chhim lam an beih champha kum hnihna pelh tukah Egypt-a indawrnaa Trump-a’n point 20 awmna Palestinian-te chenna hmuna muanna a awm theih nana rawtna a neih chu tihpuitlin tumin inremna hi siam a ni.
Inremna anga a taka kalpui vek an nih chuan lehlam lehlam hi an chhehvel – Iran, Yemen leh Lebanon thlenga kang kai indona tihtawp an hnaih ve ve ang a, Israel-in ram tam tak demna a tawrh rehin Middle East hmelhmang pawh a danglam dawn a ni.
Inremna a awm ta tih thawm a awm rualin Israel, Gaza leh hmun dangah pawh lawmna ri a ri nghal a. Hamas-in Israeli an la hren mek chhungte chuan halmawi an hal a, Palestinian-te pawhin thisen tam tak luanna chu a tawp dawn taa ngaiin kutbengin an lawm bawk.
Inremna a awm tak thu hi Trump-a’n Nilaini zan tlai tawh tak, India-a zing lamah a puang a, a sawi tawi hle a, a tak takah eng nge thleng dawn tih a la hriat rih lo.
“Israel leh Hamas ten muanna a awm nana kan rawtna thawh khatna an pawm ta tih puan a ni ta hi ka lawm hle a ni,” tiin Trump-a hian Truth Social-ah a tar lang.
“Hemi awmzia chu mi hren zawng zawngte chhuak vek an ni thuai ang a, Israel pawhin a sipaite chu muanna nghet, tlo leh daih rei a awm theih nan an hnuk kir bawk ang,” a ti.
A rawtna anga thil kalpui theih a nih chuan Republican president tan hian ram dang a dawrnaa hlawhtlinna ropui tak a ni dawn a, a campaign laiin khawvela indona awmte tihtawp a lo tiam tawh a ni.
Israeli Prime Minister Benjamin Netanyahu-a chuan inremna awm ta hi a sorkar chuan Ninganiah thukhawmin pawm an tum dawn tih a sawi ve bawk.
“Thawh khatna kan pawm ang a, mi hrente kan hruai haw ang,” a ti a. “Hei hi palainaa hlawhtlinna leh Israel-in ram leh thinlunga hnehna a channa a ni,” a ti.
Hamas pawhin inremna a awm thu puangin Israeli-te an inhnukkir ang a, an mi an mansakte an chhuah dawn tih an sawi.
“Kan mite inpekna chu a thlawn dawn lo va, kan thinlungah kan vawng reng dawn a, kan mite zalenna, indanna leh mahni kea dinna an neih hma zawng kan bei zel ang,” an ti.
Gaza thuneitute chuan October 7, 2023-a indona chhuah atangin mi 67,000 chuang an thi tawh tih an sawi a. Indona hi Hamas-in Israel chhim lam beia mi 1,200 vel an thah leh hren tura Gaza-a mi 251 an hruai vanga chhuak niin mi hren hi 48 an la awm a, an zinga 20 chu la dama ngaih an ni.
Indo a tawp dawn nia beiseina a awm mek laiin eng ang chiahin nge a taka thil kalpui a nih dawn erawh sawi lawk a la har hle tho.