Israel leh Hamas ten inkahhai an neih theih nana hma la turin zaithiam ten thuneitute an nawr

Israel leh Hamas ten inkahhai an neih theih nana hma la turin zaithiam ten thuneitute an nawr
Artist4Ceasefire tiin zaithiam leh milar ten Israel leh Hamas indona chu a tawp theih nana hma la turin US President Joe Biden leh U.S. Congress nawr nan open letter-ah an hming an ziak a, he open letter-a hming ziak thar zingah Drake, Jennifer Lopez leh Adam Lambert te pawh an tel.
Artist4Ceasefire letter hi Biden leh Congress hnenah hian kar kalta khan an thawn a, kar thuam chuang indo tawh Israel leh Hamas ten inkah-hai an puan theih nan hma la turin US thuneitute chu an nawr a, he open letter-ah hian, “I sorkar leh khawvel ram hrang hrang hruaitute chu Ram Thianghlim a nunna ten ngaihhlut an hlawh theih nan a rang thei ang bera inkah-hai a awm theih nan, Gaza-a bomb thlak tih tawp a, mihren te him dam taka an chhuah theih nana hma la turin kan phut che u a ni,” tiin an ziak.
He open letter-a hming ziak zingah hian Dua Lipa, Michael Stipe, Caroline Polachek, Killer Mike, Vic Mensa, Miguel, Kaytranada, Macklemore, Cate Blanchett, Joaquin Phoenix, John Cusack leh Lena Waithe te pawh an tel.
Open letter-ah chuan, “Tun kar khat leh a chanve chhung lekah pawh mi 5,000 chuangin nunna an chan tawh a- ngaihtuahna fim hmang thei pangngai chuan a rapthlak zia kan hria ang. Nunna zawng zawng hi a thianghlim a, eng sawkhaw rinna leh eng mi pawh ni rawh se Palestinian leh Israeli civilian te thahna hi kan dem a ni,” an ti a, “Gaza a cheng mi maktaduai 2 zinga a chanve vel zet chu naupang an ni a, hmun thuma thena hmun hnih chuang chu raltlan, an chenna in leh lo tlanchhiatsan an ni. |anpuina an dawn ngei theih nan kawng hawn sak an ni tur a ni,” an ti bawk.