Israel mite zawngin Russia airport buai

gestan hmuna Makhachkala airport chu mipui lungawi lo ten hual betin Israel mite an zawng a, thlawhna hi Israel atanga lo kal niin Israel mi a phurh an awm theih thil ah an lo chang a ni. Helai hmuna health thuneitute chuan mi 20-in hliam an tuar a, an zinga mi 2 te chu an na hle tih thu an sawi. Makhachkala hi Caucasus hmar lama awm niin Muslim mi an tam ber a ni. Flightradar atanga thu dawn danin pathianni tlai dar 7 khan Tel Aviv atangin Makhachkala-ah thlawhna a tum tih hriat a ni a. Russia-a chanchinbu pakhat Sota chuan hei hi mipui thiar khawmtu niin darkar 2 hnu-a Moscow pan leh mai tur a nih thu a sawi a ni. Israel mi duhlotu te chu mi tam tak an pungkhawm a, a then chuan “Allahu Akbar” tiin vengtu te an au khum bawk a, mi thenkhat chuan thlawhna tlan kawngah te an tlan lut bawk a ni. He thil thleng hi social media-ah video leh Russian news RT leh Izvestia-ah te thehdarh a ni.
He thil thleng avang hian Russia aviation thuneitu Rosaviatsiya chuan hun rei lo te chhung atan airport chu a khar tir nghal a, venhim lam hnathawktute pawh chanchin a hrilh nghal a ni. Helai hmuna chengte chuan boruak awm dan chu a that thu an sawi a ni. Hemi hnu hian Rosaviatsiya chuan airport chu mipui te lak atangin a him a mahse November ni 6 thleng khar rih a nih tur thu a sawi a ni. TV chanchinthar puangtu tamtak chuan airport pawna mihring la awm te thlalak leh motor tlan lai an lo tih buai lai thlalak te an tarlang a. Heng zinga video pakhatah chuan dodaltu pakhat-in poster thuziak kengin, “Naupang thattu te chu Dagestan-ah kan lawm lo” tiin. Thlalak dang lehah chuan mipui pungkhawm ten airport terminal chhungah kawngka nek chhiat tumin tharum an thawh a, hei hi airport hnathawktu ten an lo dang a ni.
Hamas ten Israel mite an thah leh an hliam do let nan Hamas mite beiin Gaza-ah na takin an che a, mi 8,000 chuang lai mai zingah a chanve lai mai chu naupangte an ni a, hei hi Russia ramah an lo duh loin Israel te an dem nasa ve em em thung a ni. Pathianni khan Israel Prime Minister Benjamin Netanyahu Office chuan Russia chu a rama Israel mite leh Jews mite an him a beisei thu a sawi a ni. Chutiang bawkin Dagestan sorkar pawhin telegram kaltlangin dan loa chetna te chu titawp tur leh a khua leh tui te chu nunphung pangngaia awm tur leh buaina chhuak thei tur pumpelh turin a chah a ni.