Israel palai nena inbia Libya FM in tuar

Libya Prime Minister chuan a foreign minister chu Israeli foreign minister nena an inhmuh avangin a suspend zui nghal a.
Libya hian Israel hi ram anga a pawm loh niin Tripoli chuan Palestinian thlawpin Foreign Minisetr in Israel hotu a hmu chuan thinrimna a siam nasa hle.
Israel foreign minister Eli Cohen chuan Libya FM Najla al-Mangoush nena an inhmuhna chu inzawmna siam ngheh nana ke penna pawimawh tiin a sawi thung a.
Israel chuan tun hnaiah Aab ram te leh Muslim-majority ram te nena inlaichinna siamthat tumin chung zingah chuan oil lama hausa tak Libya pawh a tel a ni.
Mangoush a suspend mai piah lamah Prime Minister Abdul Hamid Dbeibah chuan chhuichiang turin thupek a chhuak zui bawk a.
Cohen chuan kar kalta khan Mangough nen chuan Rome a summit neihnaah an inhmuhnaah ‘ram pahnih inlaichinna tha tak siam theihna an sawi dun’ tiin a sawi a. An sawi dun zingah humanitarian thila Israel-in tanpuina a pek theih dan tur te, agriculture, water management leh Libya a Jewish heritage te humhim an sawi dun tiin a sawi.
Libya foreign ministry chuan Mangoush chuan Israel aiawh te nena inhmuhna neih a duh lo va, tuna inhmuhna pawh hi ‘sawi lawk loh leh kal paha inhmuhna mai mai niin Italy foreign minister te nena meeting neih paha thleng’ tiin a sawi fiah thung a. Inbiakna neihah engmah inremna emaw inrawntawnna emaw a awm lo, tia sawi bawkin ‘Israel nena inlaichinna siam a duh lo bur’ tiin a sawifiah zui thung.
Informal meeting a thlen tia sawi a nih hnu hian Libya capital Tripoli leh khawpui dang dangah lungawilohna lantirin a awm zui nghal a. Kawngpui te danchah niin tyres te hal niin lungawilote chuan Palestinian flag te kengin an vai a, mahse, lungawilohna chu liantham tak a ni lo thung.
Libya province pathum aiawh presidential council chuan Israel nena inzawmna neih leh siam chu dan kalh tiin an sawi zui nghal a. Parliament a Speaker’s Office chuan Mangoush chu phatsantu tia sawiin emergency session a ko zui nghal bawk.
Libya hi kum tam tak buainaa khat tawh niin pahniha inthen phawkin pakhat chu interim sorkar khawvel ram tena an pawmpui niin pakhat chu khawchhak lama an elpui te sorkar a ni thung.
Khawchhak lama Tobruk khuaa inbun sorkar chu Libyan National Army (LNA) hotu Gen Khalifa Haftar kaihhruai a ni.
Israel hian kum 2020 atang khan Abraham Accords hmangin Israel ram pawm lote leh a hmelma ni thin te thiana siama kawm ngeih tumin hma a la a. United Arab Emirates, Bahrain, Sudan leh Morocco te nen chuan inzawmna nghet an siam tawh a ni.
Mahse, Benjamin Netanyahu sorkar chu West Bak settlement a kalpui danah leh Palestinian territory sipai chakna hmanga a run fo avangin an sawiselna hle thung a ni.
Libya-ah hian Gaddafi sorkar lai khan Palestinian thlawp an nih avangin Libya ram atangin Jews sang tam tak hnawhchhuahin an awm a, an synagogue te pawh tihchhiat a ni nasa hle a ni.