Israel-Palestinian inrem nan Abbas-a’n ram dang thawhpui inpeih

Israel-Palestinian inrem nan Abbas-a’n ram dang thawhpui inpeih
Palestinian President Mahmoud Abbas-a chuan France-in Thawhtannia Israel leh Palestinian-te inkara inremna a awm theih nana rawtna a neih anga khawvel ram hruaitute thawhpui turin a inpeih tih a sawi.
UN General Assembly-a video link hmanga Ningania thu a sawiah Abbas-a hian Gaza-a Hamas-in thuneihna an chan chu a duh lo tih sawiin ralthuam an tun a duh tih a sawi.
Palestinian ram la pawm ve lote pawh pawm tura sawmin UN pawh full membership pe turin a ngen.
Abbas-a hian Israel-in sipai chakna hmanga Gaza a bei chu a duh loh thu sawiin ‘kum zabi 20-na leh 21-na chhunga mihring chunga chhiatna lian ber an thlentir’ niin a sawi a. Hamas-in October 7, 2023-a Israel an bei pawh tha a tih loh thu a sawi.
Hamas-in Israel an beihnaah hian mi 1,200 chuang thiin hren turin mi 251 an hruai a, Gaza-a indona chhuah chhan a ni a. Israel-in a beih zuinaah Palestinian 65,502 vel an thi tawh niin Gaza-a Hamas health ministry-in a sawi.
Kum 89 mi, Abbas-a hi thla hmasaa US state department-in Palestinian thuneitu dang 80 nen an visa an hlihsak avangin New York-ah a zin thei lo.
US Secretary of State Marco Rubio-a chuan muanna a awm theihna tura hmalakna tikhawlhkhamtu niin a puh a ni.
Abbas-a hian tun hnaia Pathiannia Palestinian ram pawmtu – Canada, Australia, UK leh Portugal chungah lawm thu a sawi a. France, Belgium, Luxembourg, Malta, Monaco, San Marino, Andorra leh Denmark ten an pawm zui ve bawk.
US chuan Palestine pawm hi a duh ve rih lo va, Hamas hamthatna tur mai niin a sawi.
Abbas-a hian Thawhtannia French President Emmanuel Macron-a’n Saudi Arabia nena intawhkhawm a thlena rawtna a neih chu tha a ti.
Ruahmannaah chuan Hamas-in mi an la hren 48 chhuahin Israeli sipaiten Gaza-a beihpui an thlak an titawp ve thung ang tih a ni.
Hemi hnuah hian thuneitu inthlakin Abbas-a kaihhruai Palestinian Authority (PA) tel leh Gaza awptu Hamas tel lovin ‘inrelbawl hrang, indang, sipai awm lohna State of Palestine dinna tura kalpui zui’ a ni ang.
US leh Israel chuan he rawtna hi an thlawp lo.
Abbas-a chuan ‘muanna atana rawtna kalpui turin President Donald Trump, Kingdom of Saudi Arabia, France, UN leh mi dangte pawh a thawhpui peih reng tih a sawi.
Israel erawh chuan indo tawp hnua Gaza-a PA inrawlh hi a remti lo ve thung.