Israeli sipaiten Thai an hren ruang hmu chhuak

Israeli sipaiten Thai an hren ruang hmu chhuak
Hamas-in October, 2023-a Israel an beih tuma hren tura an lak tel zinga mi, Thai chu a ruang an hmu chhuak niin Israeli Defence Minister Israel Katz-a’n a sawi.
Nattapong Pinta-a ruang hi Gaza chhim lam, Rafah huam chhunga a bika beihpui thlakah an hmu a. Kum 35 mi hruai a nih lai hian Israel chhim lamah lova inhlawh a ni.
Nattapong-a hi man an nih tirh lamah thah a nih rin a ni tih Israeli sipai hotu chuan a sawi a. Tuna a ruang hmuh a nih hma kha chuan a thi nge a dam tih hriat a ni lo.
Kar hmasa tir lamah khan Israeli sipaite hian hren zinga mi Israeli American pahnih ruang an lo hmu chhuak tawh bawk.
Nattapong-a hi nupui nei lai niin fa mipa naupang a nei a. Hamas sipai pawl, Mujahideen Brigades-in an man lai hian Thailand-a a chhungte puih nan Kibbutz Nir Oz-ah a inhlawh a ni.
Israel Defense Forces chuan ruang zawn hna hi ‘mi firfiak an man’ inpuanna atanga thawk an ni tih an sawi.
Hostages & Missing Families Forum chuan ‘thla 20 zet indona rawng leh engmah thu chiang awm thei lo’ a nih hnuah ruang hi hmuh a ni a. He pawl hian Israeli sorkar chu mi hrente him taka chhuah an nih theih nan Hamas nen inremna siam turin an nawr.
Nattapong-a hi October 7, 2023-a hren tura hruai zinga Thai awm chhun a ni tawha ngaih a ni a. Thai dang panga chu kumin kum tir khan inkahhai puan laiin chhuah an ni.
Israeli sipaite hian Ningani khan tar nupa, Judy leh Gadi Haggai te ruang chu Khan Younis khawpuiah an lo hmy tawh bawk.
Anni nupa hi kibbutz-ah thah niin an ruang hi Mujahideen Brigades-in Gaza-ah an kalpui niin IDF chuan an sawi.
Hetih lai hian Inrinni khan Gaza Strip chhim lama US-in a thlawp puihna thil sem chhuahna hmunah inkahna a thleng leh.
Hamas hnuaia Civil Defence agency chuan Israeli sipaite silai hmeh puahah hian ei tur lak tum Palestinian paruk an thi a, tam tak an inhliam niin an sawi.
Israeli sipaite erawh chuan an kah hlumte hi anmahni pana hlauhawm taka che niin an sawi ve thung.
Kar liam taah khan puihna semna hmunah hian Palestinian tam tak kah hlum niin za tel an hliam a. Thil sem hna thawktu pawl, Gaza Humanitarian Foundation chuan mi tam lutuk dawl thei tur leh himna tha a awm theih nan an hmalakna an chawlhsan tih an sawi.
Gaza-a luhna hi thla thum a danchah hnuah Israel chuan tlem tlem luh a phal tan.
Hamas-in Israel chhim lam beia mi 1,200 chuang an thah leh hren tura Gaza-a mi 251 a hruai hnua indona thla 20 dawn a awm tawh a. Israel-in Gaza a beihnaah mi 54,677 vel an thi tawh.
Hamas hian mi 54 an la hreng a, heng zinga 31 hi an thi tawh niin Israeli sipaite chuan an ngai.