Israeli-ten Palestinian-te haw kawng, Netzarim Corridor an chhuahsan

Israeli-ten Palestinian-te haw kawng, Netzarim Corridor an chhuahsan
Israeli sipaite chuan Gaza Strip-a chhim lam atanga hmar lamna kawngpui ber, Netzarim Corridor an tih, hun eng emaw chen an luah chu an chhuahsan ta.
Kalna kawng ber an chhuahsan tak avang hian Palestinian za tel chu car leh tawlailir nen, mutbu leh bungraw tam tak phur chungin chhim lam atangin hmar lam, an hmunhma kalsan, chhe nasa tawh tak chu an pan nghal hlawm.
Israeli-te inhnuhdawh hi January 19-a Israel-Hamas inkahhai kalpui tanin a ken tel a ni a, inkahhai chhung hian Israeli mi hren 16 chhuahin Palestinian mi tang 566 chhuah an ni tawh bawk.
Inkahhai thawh khatna, chawlhkar thum chhung awh turah hian mi hren 33 leh mi tang 1,900 chhuah tura tih a ni a, mi hren 33 zinga pariat hi an thi tawh niin Israel chuan a sawi.
October 7, 2023-a Hamas-ten Israel an beih khan mi 1,200 chuang an thah bakah hren turin mi 251 an hruai a, he thil thleng hi Gaza indona intanna a ni bawk.
Israel-in a chhan let nana Gaza a beihnaah Palestinian 48,189 an thi tawh niin Gaza-a Hamas enkawl health ministry chuan a sawi a. Gaza-a in ding hmun thuma thena hmun hnih chu Israel-in an chhu chhe bawk niin UN chuan a sawi.
Pathianni khan Palestinian tam tak chu Netzarim Corridor hawn a nih rualin hmar lamah an haw tan nghal nghal.
Indona a chhuah khan Gaza hmar lam hi mi cheng 7,00,000 velin chhim lamah an tlansan a, hei hi Israeli sipaiten an beih dawn avanga civil mite insaseng tura an tih vang a ni.
Israeli sipaite hian chhim lam pawh an beih zui avangin heng mite hi vawi tam tak insuan kual ngaiin an awm phah.
Haw an phalsak leh hnuah pawh Gaza-Israel ramri atanga Mediterranean Sea kal theihna, Netzarim Corridor hi zawh an phalsak mai chuang lo.
Israeli sipaite hi thla hmasa khan corridor chhim lam atangin a tahtawlin an inthiar chhuak tan a, Palestinian-te chu kein tuipui kam hrul, Rashid Street-ah hmar lama haw an phalsak bawk.
Lirtheia kalte chuan Salah al-Din Street zawhin US leh Egyptian security contractor-ten an endik hmasak vek a ngai a ni.
Israel Defense Forces chuan Pathiannia corridor chhak lam an insaseng hi an la puang lo va, an chhuahsan a nih chuan Gaza ramri an chhuahsan dawn tihna a ni.
Sipaite an insaseng mek lai hian inkahhai puan chhunzawmna tura inbe turin Israeli aiawhte chuan Qatar an pan leh mek bawk.
Israeli sorkar hian a hmain an inbiak leh turah inkahhai thawh khatnaa thil kalpui dan fel tawk lote an sawi chhuak dawn tih a lo sawi tawh a, inkahhai hlenna tur, a thawh hnihnaa hmabak lam chu an ngai pawimawh vak lo tih a sawi.