ISUA NIHNA PATHUM

Rev Dr Ramengliana
A pian leh murna atanga km 200 bial pawnah pawh chhuak si lo, khawvela lalna leh rorelna pakhat mah tem si lo, lehkhabu ropui a ziak hmuh tur awm miah bawk si loh laia khawvel kalphung sawh sawn dawrh khawpa huhang ngah si kan Lalpa Isua Krista nihna zawng zawng kha khawrh chhuah sen zawh rual a ni lovang. Amaherawhchu, a nihna kan hriat chian poh leh kan thlarau nun a chawmin kan nun a chawi kang dawn a ni tih kan hre thung. Ama insawina ngei ngeite hi a hlutzia hriain pathum chauh han thlur bing ta ila.
1. Thutak (Johana 14:6)
Thutak hi eng nge a nih chiah sawi fiah hi thil har angreng tak a ni. Thenkhat chuan thu dik laka dang daih ang hialin an sawi. Mahse thutak leh thu dik chu a danglam thui hmel loh a. Thil nih dan ang taka sawina hi thu dik chu a ni mai a, chu chu thutak chu a ni mai bawk lo thei lo a. Amaherawhchu, nimina loa ka feh leh feh loh chungchang sawina dik leh dik loh mai mai thilah hi chuan thutak leh tak lo kan hmang meuh lo chu a ni.
Thutak tia kan sawi ngat tawh hi chuan thil nihna tak tak phur zo leh nun thapna khawp thil deuh niin a hriat thin a. ‘Thutak’ tia sawi tawp a nih phei hi chuan ‘Thil nihna tak, khawvel nihphung,’ a kawk ruih mai a. Lal Isua pawhin “Keimah hi …thutak…ka ni,” a tih hian ‘thil engkim tawpna, a nihna tak tak, a awmze dik,’ chu kei hi ka ni, a tihna a ni.
Mihringte hian thil tam tak kan inzirtir a, kan sawi thin a nih hi. Kan hre sual pheng phung a, kan intuh dik lo zel zul bawk a. Hringnun awmze dik tak leh lei-leh-van nihna tak tak kan pawh pha tak tak lo. Rin thuin khawvel mite chu an kal mai mai a ni ber. Lal Isua khan, “A khuhna zawng zawng, in mit tivaitu zawng zawng, in hriatna dik lo zawng zawng piah lama awm, thil engkim nihna dik chu Keimah hi ka ni,” a tihna a ni a. Chu chu ‘Thutak’ chu a ni. Lei-leh-van thu dik chu Isua Krista hi a ni a, amah ringtu chuan a tisual ngai dawn lo a ni. Thil dang zawng hi chu dawt mai an ni si a.
2. Thuneihna (Matthaia 28:18)
“Lei leh vana thuneihna zawng zawng ka hnenah pek a ni tawh,” a tih kha Lal Isua thu sawi chhuah zinga kan nunin a ngaihthah pawl tak a ni leh a. Thihna hneha a thawh leh hnu, vana a lawn dawna Thupek Ropui a pek dawna a sawi kha a nia. Amah khengbettu Rom sorkar hlauva an tawmim lai leh chu sorkar thiltihtheihzia ni tina an hmuh reng laiin ‘lei leh vana thuneihna’ zawng zawng chu A kuta pek a nih thu a sawi chhuak mauh mai. “Rom sorkar hi hlau reng reng suh u,” a tihna te pawh a ni ang chu. Mi tam zawk tan awih a har ngawt ang tih a chiang.
Zirtirte erawh chuan an pawm hmak a. Khawvel chakna chu eng angin an chungah rawn inluling thin mah se a tawpkhawka thuneihna neia roreltu chu Isua Krista a ni tih hriain Chanchin Tha chu an hril ta a ni. Pathian thiltihtheihna kawng tam taka lang chhuak an hmu a, khawvel tidanglamtu a lo ni ta a ni. Kum 300 hnuah chuan khatih laia thiltihtheihna nei sang ber, Kristian tiduhdah thintu Rom sorkar meuh pawh Kristian sorkarah an let ta rup mai a nih kha.
Lal Isua thu sawi hi vawiina kan pawm thiam a pawimawh ngawt mai. Kan hmaa harsatna lo inlar tuam tuam leh beidawnnain min tlak buak lai te, he khawvela Sual Setana inluling riauva a lan lai te hian ‘lei leh vana thuneihna zawng zawng’ chu kan Lalpa kutah a awm tawh, tih hriatna hian tha thar min pe thin a. Hmelmapa hi Ama phal china che ve mai mai chauh, dawl zawra la zawr tur, a ni tih i hre nawn fo ang u.
3. Thawhlehna (Johana 11:25)
Mi tam takin kan hriat hmaih thin chu Juda sakhaw vuan theuh theuh zingah Isua hun laia Sadukaite khan thlarau khawvel leh thih hnua thawhlehna a awm an ring miah lo kha a ni. Farisaite nen khan an in-debate fova, an inmil lo viau bawk a. Heti zawngah chuan Tirhkoh Paula pawh kha a inti-Farisai fo a nih kha. Thih hnu khawvel leh thlarau lam thilte chu a awm ring mah ila engtiang chiahin nge? tih te, tu sawi nge rintlak ber? tih te chu chian har tak a ni tho tho a.
Chutih laiin Isua erawh chuan fiah fek fawk leh tawng sehchilh miah lovin Amah ngei chu ‘Thawhlehna’ a nihzia a sawi ta a ni. He a thu sawi hian Sadukaite zirtirna zawng zawng a hnial fithla nghal vek a. Thlarau khawvel hi a awm chiang a, chumi chu Krista Isuaah chuan kan hmu a ni. Kan thih hnu piah lama kan beiseina zawng zawng pawh Amahah chuan a innghat vek a, Amah neitu chu a nunna leh thawhlehna chungchangah Krista chu a innghahna tlak em em a ni, tihna a ni.
He a thu sawi dikzia hi Isua khan a lantir nghal bawk a. Lalzara kha ni 4 liam taa thi a ni a. Mihring ngaiha a taksa chu tawih a, rimchhe em em tawh tur a nih lai khan tawngkam mai a “Lo chhuak rawh,” tiin a ko chhuak hlawl mai a nih kha. Isua khan nunna leh thawhlehna chu a kuta awm a nihzia mi zawng zawng hnenah hnial leh hai theih rual lohvin a lantir ta a ni.
Tunlai tawng taka mi ‘confi’ ber chu Isua kha a nia. A thu sawi reng rengah khan tumah a tawng chhan ngai lo va, tu hnenah mah thupha a chawi ngai lo va, tumah a chung en ngai lo tih kan hria. Dik a tih a sawi mai a, a duh duh a ti bawrh bawrh mai a nih kha. Chuvangin, a danglam a ni tih hi chu a chiang khawp mai.