IT hmang tangkaite lawmman pe Hmang tha lo enzui kan tum – CM

Information Communication & Technology department buatsaihin information technology hmang tangkai department leh office hnenah Government Online Excellence Awards 2024 hlan a ni a. Chief minister Lalduhoma leh ICT minister Dr Vanlalthlana’n an hmanpui
Chief minister chuan IT hmanga awlsamna chu sawrkar inrelbawlnaah pawh an chhawr nasa ta viau tih sawiin, “Hnathawh rang zawk, awlsam leh tlawm zawk min pe a, mipui tan leh sawrkar tan hlawkna min pe ve ve a, huapzo sawrkar neihna hmanraw tangkai a ni. Website tha tak nei te, online service kalpui mekte pawhin uar chho deuh deuh ula, a la hmang tha tawk lo pawhin hmang tha ang u,” a ti.
Department thenkhatin website an update tha tawk lo tih an hria a, contact zuina tur address dah mumal lo pawh an awm nia an hriat thu a sawi a. CM Office chuan uluk lehzuala enzui a tum tih a sawi a ni.
“Kan sawrkar tirh phat atangin IT hman kan uar a; Mipui Aw, CM online te tha takin kan kalpui zui a ni. Tangkai lehzuala hman tumin SIT Dashboard, kan rama projects kan kalpui zawng zawngte engtik lai pawha kan lo endik theihna tur kan duang mek a. Kan peih har tawh loang,” chief minister hian a ti.
ICT minister chuan IT lama hmasawnna in sawrkar inrelbawlna man nasa takin a titlem a, lam hla zawk atanga sawrkar office dawrtute tan remchang chhawpsakin, awlsamna a pe tih a sawi. “IT lama hmalakna kan uar deuh deuh a tul a, mite hnunga kal loa an hmaa kal kan tum zawk tur a ni,” a ti.
ICT chief informatics officer Dr Lalthlamuana sawi danin, sawrkar website endikna atan hian Gartner Maturity Model an hmang a, anmahni department-in web monitoring system an duan an hmang bawk. Award hi guideline fel tak neia kalpui niin, Selection Committee leh Technical Evaluation Committee an siam a ni.

* Category-I official department/ office website 120 endik a ni a. Top-10 ah 13 thlan chhuah an ni.
* Category-II sawrkar zirna in website 45 endik a ni a. Top-10 ah 11 thlan chhuah an ni.
* Category-III Best Online Service Initiatives top-3 ah service 3 leh a enkawltu department /office 13 thlan an ni.
* Category-IV Special Recognition department /office 5 thlan an ni.
* Category-I ah hian Transport department – transport.mizoram.gov.in chu pakhat a ni.
* Category-II ah Govt. Aizawl College – gac.ac.in pakhat a ni.
* Category-III ah deputy commission tin (11) chu pakhatna an ni.
* Category-IV ah AMC, Finance, SCERT, Police leh DC Khawzawl pek an ni.