Italian dy. PM Tajani-a’n India tlawh mek

Italian dy. PM Tajani-a’n India tlawh mek
Italian deputy prime minister, foreign affairs & international cooperation minister ni bawk, Antonio Tajani-a chuan kumina a vawi hnih nan Nilaini khan New Delhi a thleng a, ram pahnih inkara thawhhona awm mek tihngheh lehzual tuma zin a ni.
External affairs ministry thupuangtu, Randhir Jaiswal-a chuan Tajani-a’n India a thlen thu hi X-ah a tar lang a, Delhi leh Mumbai-a hun a hman turah India-Italy Strategic Partnership a tihchak dawn tih a tar lang.
Tajani-a hian Nilaini khan New Delhi-ah External Affairs Minister S. Jaishankar a kawm nghal a, Ningani hian Mumbai-ah kalin thil pawimawh dang a ti zui ang a, Zirtawpniah Mumbai atangin an ram a pan ang.
Italian hruaitu hi tun hnaia ram pahnih aiawh mi pawimawhte kawng hrang hranga thawhhona siam tur leh thawhhona awm sa tihnghehna tura an indawr hnua India tlawh a ni.
November 23 khan Prime Minister Narendra Modi leh Italian Prime Minister Giorgia Meloni chu Johannesburg-a G20 Summit-ah an lo inkawm tawh a, hruaitu pahnihte hian sumdawnna, investment, ram venhimna, thil thar chin chhuahna, AI, van thengreng leh zirna kawnga tanho dan tur hrang hrang an sawi dun.
Meloni-i nena an inkawm zawhah Modi-a hian, “Prime Minister Giorgia Meloni-i nen hun hlawk tak kan hmang dun a. India-Italy Strategic Partnership chu chakna atangin chak lehzualah a kai a, kan ram hnih mipuiten an chhawr em em a ni,” tiin X-ah a tar lang zui.
“Sumdawnna, investment, ram venhimna, thil thar chin chhuahna, AI, van thengreng leh zirna kawnga kan ram hnih inkungkaihna tihngheha tihlen zual dan tur pawh kan sawi dun a ni,” tiin X-ah vek a tar lang bawk.
Firfiaka chete suma puihna awm thin tihtawp a nih theih nana tanrual pawh tha an ti a, Prime Minister Modi-a chuan, “India leh Italy chuan sum hmanga firfiakna chawi kan tumna do kawngah tanrual tha kan ti a. Hei hi thil pawimawh leh tih hun tak niin firfiaka chetna leh anmahni thlawptute dan chepna kawngah hian intihchak zel kan mamawh hle a ni,” a ti.
Tajani-a leh Jaishankar-a hi September thla khan New York-a 80th United Nations General Assembly (UNGA)-ah an lo inhmu tawh a, hemi tum hian ram pahnih thawh dunna sawiin hmun hrang hranga thil thlengte pawh an sawi dun bawk.
India leh Italy hian kum 1947 atang khan thawhhona an lo nei tawh a, an inkar siam tha zelin eibar dapna kawngah pawh an inthlung nghet hle a. An mite ve ve inpawh tawn theihna tur pawhin hma an la nasa hle a ni.