Italian Open first round paltlang Nadal

Italian Open first round paltlang Nadal
Vawi 10 tehreng a champion tlin tawhna Rome khaw tournament lian Italian Open first round-ah Ningani khan Rafael Nadal chuan fiahna lian hmachhawnin, set hmasaber a hloh zet hnuah 4-6, 6-3, 6-4-in Belgian qualifier Zizou Bergs a paltlang thei hram a ni.
French Open inbuatsaihna Rome khaw tournament-a Spaniard champion hnuhnunber chu kum 2021 daih tawh kha niin, kuminah kuminah a title hriatbel tak hawn leh tumin bul a tan a, kum 24 leka upa leh world number 108-na luahtu ni bawk Belgian a lo tang thei fu dawn a, mahse, darkar thum dawn an inbeih hnuah second round-a Polish seventh seed Hubert Hurkacz hmachhawn thei turin a tlang ta a ni.
Inkhelh banah Nadal chuan a match tha ber a nih loh thu sawi chungin kha ai khan practice-na lamah pawh a khel tha zawk tih a sawi a, chuti chungin hnehna kawng a haikaw thei tih a tarlang tel.
Kum 37-a upa ni ve tawh world number one hlui Nadal hi khel bawr na dam thei lo avangin kum khat dawn tournament lamah a hmel hmuh tur a awm lo a; kumin January thla khan Brisbane-ah kir mah se hliam avang bawkin a chawl zui leh a; thla hmasa mai khan Barcelona-ah second round rawn lut leh nawlhin, Madrid-ah phei chuan fourth round a thleng a, tunah Rome khawpui chamchilh leh mekin, French Open atan inbuatsaihna a la kalpui ve mek a ni.
Italian Open second round-a a tum leh tur kum 27 mi Polish world number nine Hurkacz nen hian tunhma lamin an la inhmachhawn ngai lo.
Tarlan tawh thin angin, Nadal hian 2024 season hnu lamah chuan tennis inelna chawlhsan ve tawh a tum thu a lo sawichhuak tawh a, a chawlh hma ngeiin grand slam title 22 a lak tawh belhchhah tura a ropuina mual French Open-a vawikhat tal inlan leh hram a duh thu a sawi a, Roland Garros-ah hian kan hmu ngei dawn em tih chu a hun a thlen zet hma loh chuan sawi chian ngam a la ni lo!
Italian Open round khatna a paltlang hnuah Nadal chuan, “Roland Garros thleng turin chawlhkar hnih leh a chanve chiahin min dang ta a; chutih laiin ka taksain a tlin tawp sawrchhuak turin keimah hi ka infiah a la ngai a, ka hmachhawn tur thlir chunga ka inpeihchhuah leh chhuah loh infiah ka la hmabak zel rih a ni.
“Roland Garros chungchang ngawr ngawr ka sawina pawh a ni lo a, ka match khelh leh tur chungchanga ka dinhmun ka sawina a ni tel,” a ti.
Ningani inkhel dangah Britain star Jack Draper pawh second round lut zingah telin, Croatia player Borna Coric lakah 7-5 6-1 hnehna a chang a, defending champion Daniil Medvedev nen an intum ang.
Briton dang Dan Evans erawh he tournament kal lai atang hian Italian Fabio Fognini chuan 6-4 3-6 6-2-in a hnawtchhuak thung.