Italian tlangah dinosaur hniak thahnem tak hmu chhuak

Italy hmar lama national park-ah kum maktaduai 210 vela mi tawh dinosaur hniak sang chuang fe hmuh chhuah a ni.
Hniakte hi a laia hawlhtlangin cm 40 vela liante pawh a awm a, a tlara awmin a lan danah chuan ke leh kut hniak a nih hmel.
Heng dinosaur-te hi prosauropod an tih, thlai hring ei chi, nghawng sei tak nei, lu te reuh te leh kut tang/tin hriam leh khawng tak nei an ni.
Milan-a paleontologist Cristiano Dal Sasso-a chuan, “Hetiang thil hmuh chhuah ropui lutuk hi keimah ngei pawh ka chenna chhehvelah hian a awm ang tih ka lo ngaihtuah pha ngai lo,” a ti.
September thla khan thlalatu pakhatin Milan hmarchhak lama Stelvio national park chhunga tlang ding tha takah metre 100 chuanga thui hniak indawt hi a hmu chhuak a ni.
Kum maktaduai 250 leh 201 liam ta inkar, Triassic period an tihah khan heng lai tlang hi a zawl a la ni a, a hnuah Alpine chain (tlangdung zinga mi)-ah a insiam ta a ni.
“Heng lai hmun hi dinosaur tamna a ni a, scientific takin rohlu a ni,” tiin Dal Sasso-a chuan a sawi.
Ran rualte hi zawi zawiin an insawn kual thin niin a sawi a, ‘khawsak dan bik riau pawh an nei a, ramsa dangte hi a bialin an awm khawm thin a, hei hi an invenna pakhat a ni tel’ niin a sawi.
Prosauropod-te hi metre 10-a sei pawh an awm thin a, an ke pahnih hmangin an kal a, a chang chuan an kut chu he hma lam angin an hmang thin bawk a, hetianga an ke leh kut hniak a awm chuan an chawl a, an bawk tihna a ni thin.
A hmun hmu chhuaktu thlalatu, Elio Della Ferrera chuan a thil hmuh chhuah chuan ‘keimahniah awmze thar a neih a, kan in, kan planet, kan chenna hmun kan hriat chian lohzia a tilang’ tih a sawi.
Italian culture ministry-in thuchhuah a siamah chuan a hmun hi a kilkhawr hle a, kalna kawng a awm lo va, drone leh remote sensing technology erawh bun a ni thuai dawn tih an tar lang.
Stelvio national park hi Italy-in Switzerland a rina bul lawk, Fraele valley-a awm niin nakumah Winter Olympics nghah a ni dawn nghe nghe.