Italy – A zozai ta!

Italy – A zozai ta!
Thawhlehni FIFA World Cup UEFA Qualifiers penalty petah mualneitu Bosnia-Herzegovina hneh loin an tlawm a, world cup hnuhnung pahniha inlan pha lo Italy chu kum inah pawh hmuh tur an awm leh dawn ta lo a, a zawna tum thum ngawt Fifa inelna lian bera ‘The Azzurri’ an tling pha lo hian Italian mipui thin a tiur ngang mai a, an ram national football-ah ‘change’ thleng se tih duhna thawm a ring ta kher mai!
Football atchilh ram leh world champion hial pawh lo ni ve tawh ram tan a zawna vawi thum em em world cup khelh phak loh hi a na lutuk a, Italy ram media liante pawh an insum zo ta lo!
Italy rama an nitin chhuak chanchinbu lian Corriere della Sera chuan Nilaini chhuak an chanchinbu phek hma ngei maiah ‘World Cup anchhia’ (The World Cup curse) tih an dah kua a; he game-a khawvel player ropui ber ber lo chher chhuak tawh ram ve lemin kum 2006 daih tawha a vawi lina atana world cup trophy an chawi hnu world cup match-a vawi khat chiah an la chak chu pawmzam theih loh a nih thu leh an ram football-ah insiamthatna a thlen ngei a ngaih thu an chhuah.
Sports newspaper lian pahnih La Gazzetta dello Sport leh Corriere dello Sport pawhin headline-ah mite’n world cup an khelh mup mup laia in lama an tawm leh bik dawn thu an tarchhuak a, ‘We’re all staying at home’ an ti kulh!
Bosnia an hneh loh rual khan Italian mipui chu lungngaiin an indawmkun leh thup a; Rome kawpui pub pakhata inkhel entu Davide Caldaretta chuan tan phat atanga an game fuh loh thu leh an team that tawk loh thu a sawi.