Italy camp atangin racist-a puh Acerbi inpuchhuak

Italy camp atangin racist-a puh Acerbi inpuchhuak
Kartawp hi international football khelh runpui intan hun a ni leh tawh a, national team hrang hrang inbuatsaihna thawm richhuak mek karah Inter Milan defender Francesco Acerbi chu mihang player laka hmusitna leh diriamna lantira puh a nih avangin Thawhtanni khan Italys national team training camp atangin hawtir a ni.
Pathianni Serie A inkhel pakhata Inter leh Napoli inkhelh tumin Napoli mihang defender Juan Jesus chuan Acerbi hi a vunrawng avanga hmusitah puhin, second half-ah Acerbi laka a lungawilohna chu referee hnenah a thlen a; television-a a lan danin Jesus hian referee chu a chunga thil thleng a hriattir rualin a kawra league lamin anti-racism campaign an kalpui mek tarlanna ‘Keep Racism Out’ badge chu a hmuhtir nghe nghe.
Kum 36 mi Acerbi hian Rome khuaa Italy squad a zawm hman zet a, mahse, a chet danah sawi a awm tak avangin squad atanga paih niin, Roma defender Gianluca Mancini chuan a hmunruak hi a luah a, nimin, Thawhlehni khan Rome atangin Azzurri hian United States an thlawklut a, tah chuan Venezuela leh Ecuador nen friendly match an khel ang.
Italian football federation (FIGC) thuchhuahin a tarlan danin, Acerbi chuan national team internal policy zulzuiin puh a nih chungchangah Italy head coach Luciano Spalletti leh player-te biain Jesus laka chi inthliarna lantira puhna a tawh chungchang a sawifiah.
Acerbi hian camp atanga a inputchhuah hnua chanchinbumite a hmachhawn tumin Jesus laka chi inthliarna tawngkam (racist language) a hman loh thu sawi chungin, “Kum 20 lai football ka lo khel ve ta a, ka sawi tur chin chu ka hre hneh khawp mai. Khelmualah chuan thil tamtak a thleng a, mahse, referee-in hamrik tawpna a ham tawh chuan kan inchibai leh mai a, a hma ang khan thil a pangngai leh mai thin.
“He khawvel khawi hmunah mah hian racism hi a thleng tur a ni lo a, national team training camp chhuahsan ka ngai ta hi pawi ka ti a, mahse, hei hi thil thlen dan a ni miau a,” tiin a thiamthu a sawi.
Brazilian Juan Jesus pawh tawngchhuak ve tawh mah se khelmual chhunga thil thlen dan chiah a sawichhuak tel lo a, “Khelmuala thil thleng chu khelmual pawn lama richhuak tur a ni lo a, Acerbi pawhin ngaihdam min dil tawh a, a dangnalah a tawlhtlu ve palh a, pa tha tak chu a ni.
“Eng le khaw le, thil langtlang chu, puitling kan ni a, thil thleng chu khelmualah kan chingfel thei tur a ni. Ngaihdam min dil tawh a, ani pawh hmalam panin a kal zel a, referee-in tawpna a ham tawh a, tah chuan engkim a tawp fel a, a tha vek e,” tiin thubuai hlabuaia lak chhunzawm lam a hawi bik lo.
Team pahnih 1-1-a inhnehtawkna inkhel tawp rual khan Acerbi leh Juan Jesus kha a kuah pawh an inkuah tha ve leh mai a; kha game-ah khan hun tawp lamah Napoli player Jesus chuan a club hlui lamah an siphurh sutna goal a thun nghe nghe.
Kum 32 mi Jesus chuan Acerbi kha pa fing tak a nih avangi9n khati ang thil kha a thlen nawn tawh loh a beisei thu a tarlang tel a; referee pawh khan Acerbi lakah hremna a lekkawh bik lo.
FIGC lamin investigation an kalpui a nih a, a thiamlohna hmuhchhuah a nih chuan Acerbi kha match 10 tal inkhel thei lo tura hrem theih a ni ang.
Hrem leh hrem loh chungchangah hian Italian league sporting judiciary hnena referee report thehluh chuan kawngro thui tak a su thin.