Italy hnehtu Englang an tling

October 17, Thawhleh zan khan Euro 2024 khelh tur zawnna khelh chhunzawm a ni a, Group C hmahruaitu England chuan an mikhual Italy an hneh a, Euro 2024 khel turin an tling. England lakah an tlawm leh tak vangin European champion Italy dinhmun a chiang lova, inelna lian hmachhawn phak lo thei dinhmun derthawngah an ding mek.
England hian Euro 2024 khel tura tling chiang turin Wembley Stadium-a an mikhual Italy lakah tlawm pumpelhin, point khat hmuh belh an mamawh. Euro 2020 final-a an hneh loh Italy lakah chak an harsat vangin fimkhur takin an inlan a. Goal chhuah hmasa zawka tang chungin hnehna an chang let a, kum 1977 hnu lama a vawi khat nan an mikhual Italy an hneh. England hian an mualah ngei Italy an hneh hlei thei lo thin a. Euro 2024 khel tur zawnnaah erawh an muala an hneh bakah Italy leilungah ngei hnehna an chang ta thung.
England nawr tawm leh zual tura chak mamawh Italy hian Wembley-ah bul an tan tha a, hma takah goal an thun. West Ham United striker Gianluca Scamacca chuan Di Lorenzo siamsak tha tak chu minute 15-na lekah hnaite atangin a pet goal a, hmahruaina goal a thun. Hma takah goal an thun vangin European champion Italy hi an inlan zui a, Three Lions er let an tuar lova, goal thum ngawt an chhuah zui a, chak an mamawh em em laiin tlawm zawkah an tang.
Si an phurh hnuin England an insiamtha thuai a, Real Madrid tana che tha tak Jude Bellingham chu hnuhnawm takin a inlan a, danglamna thlentu a ni. Real Madrid tana goal thun thei tak Bellingham hi Giovanni di Lorenzo chuan box chhungah titluin penalty a chawi. He penalty hi captain Harry Kane chuan minute 32-naah a pet goal a, an si phurh a sut. 1-1 a nih hnuin inkhel a hmuhnawm leh zual a, goal thun tumin an innawr tawn nasa hle. Goal thun theihna hun remchang nei ve ve mah se chawlhlawk hmain goal dang a luh belh thei lova, inhnehtawk chungin chawlhlawk an hmang.
Chawlhlawk hnu lamah Gareth Southgate-a team an khel tha leh zual a, goal hnih an thun belh zui leh. Manchester United forward Marcus Rashford chuan minute 57-naah Jude Bellingham siamsak atangin hma an hruai nawn lehna goal a thun. Hnufual zawk an nih nawn leh hnuin Italy in goal thun ngei tumin tan an khawh a, mualneitu an nawr na thei hle. An khingpuite nawr viau mah se goal an thun belh thei lova, goal chhuah belh leh ta zawk.
Hun tawp dawn lam hnaih minute 77-naah England hian goal an thun nawn leh a. Penalty atanga goal hmahruai thuntu Harry Kane chuan minute 77-naah an chakna nem nghet turin an goal thumna a thun belh leh. Italy in an si phurh sut tumin tan khawh mah se goal an thun thei lova, an hmahruaina tihzau tumin tan khawh bawk mah se England pawh an hlawhtling thei bik lova, hun tawp thlengin goal dang a luh belh thei tawh lo. Kum 1977 hnua a vawi khat nan England chuan an tualzawla an mikhual Italy an hneh ve ta nge nge a, point thum hlu tak an hmu.
Team lian Italy lakah hnehna an chan vangin England hian khelh ruk atangin point 16 an hmu a, Group C hmahruaitu an ni chhunzawm zel. Euro 2024 khel tura tling chiang tawh England hnuai chiahah hian khelh sarih atanga point 13 hmu mek Ukraine an awm a, point 10 hmuin Italy in pathumna an luah ve mek bawk. Italy leh Ukraine te hi an inhmachhawn zui leh dawn a. Champion lai Italy tan direct a Euro 2024 khel phak turin Ukraine hneh an ngai a. Ukraine lakah hian an chak zo lo a nih chuan play-off atanga tlin tumin an beihzui a ngai tawh ang. England hi Euro 2024 khel tur zawnna neih mekah tlawm nei lovin khelh ruk chhung an kaltluang ta chiah a. Hei hi kum 2012 hnu lamah inelnaa tlawm nei lova an kal tluan rei ber tum a ni. An khelh that tluan em vangin Germany in a thlen tur Euro 2024-ah pawh champion tura rinkai an ni ngei dawn a. Hun rei tak hnuah trophy lian la turin inrintawkna sang tak an nei mek.
Group C-ah pahnihaa kir leh tura chak mamawh Ukraine hian thawhleh zan khan an group-ah chak nei lova a mawngphaha awm mek Malta an hmachhawn a, 3-1 a hnehna changin point thum hlu tak an hmu a, Italy an lehpel.
Khelh ruk an hmachhawn tawha la tlawm vek Malta hian Ta’ Qali National Stadium-a an mikhual Ukraine lakah bul an tan tha viau a, minute 12-na lekah Paul Mbong hmangin hmahruaina goal an thun. Hma takah goal an thun vangin an phur a, Euro 2024 khel tur zawnnaah a vawi khat nan hnehna chan an inring hman hle.
Goal chhuah hmasa zawkah tang mah se Ukraine in na takin Malta an nawr let a, chawlhlawk hmain an lehthal hman. Minute 38-naah Ryan Camenzuli own-goal vangin an si phurh an sut a. An si phurh an sut hnuin minute 43-naah Artem Dovbyk chuan hma an hruai letna goal a thun a. 2-1 a hma an hruai reng hnuin minute 85-naah Mykhailo Mudryk chuan an goal thumna a thun zui leh a, an chakna a nem nghet. Malta lakah 3-1 a hnehna changin Ukraine in hma lam an pan a. Malta erawh chuan table mawngphah an luah nghet deuh deuh thung.