Italy leilungah Bayern an tlawm

On Feb 16, 2024 15 0

Nilaini zan Champions League last-16 first leg inkhel pakhat zawkah Italy rama zinchhuak Bayern Munich chu Societa Sportiva Lazio khelmualah sikhat faiin an tlawm a, goal lut awmchhun hi red card hrinchhuah penalty atanga irhchhuak a ni.
Second half minute 67-ah box chhunga awm Gustav Isaksen ke a tlawhsak avangin France international Dayot Upamecano chu straight red card hmangin hnawhchhuah a ni a, chu chuan penalty keng telin, Ciro Immobile chuan Lazio chakna goal awmchhun ni zui ta chhuihlutin, season kal laia a goal 10-na a ni nghal.
Away team mah ni se chak tura rinkai zawk Bundesliga giants Bayern khan tlarhma lamah star rual an tlar a, an zingah hian Germany a thlen hnua goal khung mar rei tawh tak Harry Kane pawh a tel ngei a, mahse, England captain pawh hian Bavarians tlawm tur a chhan zo ta bik lo a, ni nga chhunga Bayern tlawm vawihnihna niin, an manager Thomas Tuchel-a lakah ‘pressure’ a sang zual sauh.
Karliamta Inrinni mai pawh khan tualchhung league lamah Munich team hi Bundesliga title race-a an elpui lian Bayer Leverkusen khelmualah sithum faiin an tlawm a, league table-ah pahnihna la luah chhunzawm bawk mah se point nga ngawtin hmahruaitu Xabi Alonso team Leverkusen lakah an hniam tawh.
German club zinchhuah hian chance tha han tih tur ang siamchhuah pawh an harsat ve reng reng a; first half tir lamah an top scorer ni mek Kane chuan goal kham chungah a hun tha neih thlawhchhuakin, second half tir lamah Bayern captain leh goalkeeper ni bawk Manuel Neuer chuan Isaksen-a goal tur tha zetin a dansak ve bawk.
Tarlan tak angin, Lazio counter-attack vung chhoh laiin Bayern defender Upamecano chu Isaksen lakah atthlak takin a ‘foul’ a, Lazio captain leh an club legend ni bawk Immobile chuan Neuer-a tluk lohna lamah penalty chhuihlutin, Stadio Olimpico mipui khat tlim hmur chu lawm avangin a sapataltir!
Karleh Thawhlehni maia kum 34 tling chho ve tawh tur Immobile hian a birthday thlen hmain a club vawn lai chu Europe-ah hnehna lian a sualchhuahpui a; Munich khawpuia March ni 5 second leg-ah an lama goal lut tur an hum theih chuan Rome khaw club hian Champions League last 16 tum thum an thlennaah he tournament-a vawiruk tehreng champion tling tawh German champion petchhuakin round sang zawk an lut thei tawh ang.
Tarlan tak angin, Tottenham striker hlui Kane kha season kal laia Champions League game vawisarih a khelh tlinna niin, chuti zatah chuan tum li lai goal a khung zo lo tling ta a; group stage bikah khan Champions League goal-a inrawlhna nei hnem ber player ni mah se Italy leilungah a langsar chhuak zo lo a, a career-a major trophy hmasaber tur dang pakhat chu a tawngbaw zo dawn em tih a chiang lo leh ta phawt rih!
Inrinni lamah hmahruaitu ngam loin Bundesliga title tum 12 lakzawn an tumna a tla-hniam tawh bawk a, Champions League lamah tal Bayern Munich-in insiamthat an mamawhna a san hle laiin team khawng lutuk lo tura ngaih Lazio tihte mai mai an han hneh lo zui leh a, goal zawnah vawikhat te pawh ball an thawnlut zo lo lehnghal a! Tuchel-a dinhmun a khirh zual zel lo thei lo a ni.
Bayern player-te khan Rome khaw inkhel boruak an ngam lo deuhte pawh a ni mai thei a, kum 2000 hnu lama club-in Champions League knockout match an khelh leh vawikhatnaah Lazio supporter rual thawm kha a pui hep hep ve em bawk a ni!
Italian-ho kha Serie A table lamah pasarihna lai la ni bawk mah se an point khawl en chuan league table chhip luah aiin relegation zone-a luhthlak hnaih zawk an ni a, tualchhung league lama an dinhmun enin Champion League lamah tal engemawtak hlawhchhuah duhna an nei lian thawkhatin a lang a, kum 24 chhunga a tumkhatna atana Champions League quarter-final luh an tumna kawngah gameplan mumal tak an nei tih a hmuh theih a, an kawtkaiah chuan an hlawhtling ta phawt a, Allianz Arena lamah hmabak hautak zawk hmachhawn tur an la nei.
Kum thum kalta khan Champions League round of 16-ah bawk hian team pahnih hi an lo intawng tawh a, tah chuan khelh hnih belhkhawmah 6-2-in Italian-ho an tlawm a, kha mi tuma an chak loh phuba kha Lazio hian la zo tak ang maw?
Bayern Munich kha an game hnuhnung pahnihah an tlawm ni mai loin goal an khung zo lo ve ve a, chu chuan coach Thomas Tuchel-a dinhmun a tichep sauh a; inkhelh banah German coach hian bul an tan that thu leh minute khatna leka chance an hmuh nghal thu sawi chungin Harry Kane leh Jamal Musiala-te’n an hun tha neih bawhpelh mah se first half-ah inkhel an thunun tih a sawi.
Tuchel chuan sawizawmin, “Second half-ah erawh sawimam ngaihna awm lo khawpin kan khel chhe zui ta tlat a; mimalin tihsual kan ngah a, chu chuan kan tumpuite chan a titha a, concentration kan hloh a, kan game kal vung mar tur kan hloh zui ta bawk a, kan tlawm chhan kha keimahni mawh liau liau a ni. First half ena tlawm lo tura ngaih zawk kha a chak lo zawkah kan tang ta a ni,” a ti.
Bayern boss hian a hmalam hun tur chungchang zawhna chhangin, chu chuan amahah buaina emaw enghelh tur emaw a siamsak lo tih a sawi.
Munich defender Dayot Upamecano kha Italy leilunga Bayern tlawm chhanah a puh loh theih loh a, mihang a lo ni ber kher bawk nen German fans atang ngeiin a vunrawng avanga diriamna thawm a richhuak nghal a, chu chu club lamin social media X kaltlangin an chhanglet a, “FC Bayern chuan social media lama chi inthliarna lam hawi zawnga Dayot Upamecano deusawhna chu na takin a dem a, chuti ang inhuatna tawngkam chhakchhuaktute chu kan club fan an ni thei lo ang,” tiin.
Kum 25 mi Upamecano kha Rome khawpuia a red card hmuh avang khan Munich khaw second leg-ah a inlan ve thei dawn ta lo a ni.