Italy tan Maldini chhuan thumna!

Italy tan Maldini chhuan thumna!
A pu Cesare Maldini khan Italy tan match 14 khelin, a pa Paolo Maldini phei chuan game 126 a khel tling a, tunah Maldini chhuan thumna (third generation) Daniel Maldini chuan a pa leh a pu hniakhnung zuiin a vawikhatna’n ram tan a khel ve leh ta a, Thawhtanni zan Nations League inkhel pakhata Italy-in 4-1-a Israel an sawpna inkhel tawp hma minute 16 la awmah Giacomo Raspadori thlak Italy debut a nghakchhuak.
Kum 23 mi Daniel-a’n khelmual a luh chiah khan Maldini chhungkua hi Italy national team tana pu, pa leh fapa khel kim vek thei hmasaber an ni.
Monza attacking midfielder Maldini Jr. chuan inkhelh banah a hun tawn chu nuam leh duhawm a tih thu sawi chungin ram tana a inkhel lai a nu leh pain a hmuna an tawiawm thei lawmawm a tih thu leh in an thlen huna Italy debut chungchang a sawipui tur thu a tarlang tel.
Indonain a tlakbuak mek Israel hian an ram chhunga inkhelh a rem loh avangin Hungary chu home atan an hmang chawt a, tun kha kumin bika Hungary ram pawna an inkhelh vawikhatna a ni.
Italy ram khawpui pakhat Udine-a Bluenergy Stadium-ah ram pahnihin UEFA Nations League Group A2 match an khel a; mualneitute team tan Giovanni di Lorenzo chuan goal hnih khungin, Mateo Retegui leh Davide Frattesi-te’n goal khat ve ve an thawh ve bawk a; Israel goal neihchhun kha second half tir lam minute 66-a Arab pa Mohamed Abu Fani tihluh a ni.
Luciano Spalletti team khan chawlhlawk hmain an kawtkaiah goal an khung zo lo thei dawn takngiala a lan hnu minute 41-ah striker Mateo Retegui chuan penalty atangin hmahruaina goal a chhuihlut a, half time-ah sikhat faiin Italy chuan hma an hruai phawt.
Second half tir lam minute 54-ah Giacomo Raspadori free kick pet atanga ball chhuak hmangtangkaiin defender Di Lorenzo chuan home team goal hnihna a thawh ve leh.
Sihnih an phurh hnua Israel erlet tan Fani chuan minute 66-ah mikhual siphurh pakhat zawk sutna goal khungin, hei hi Juda-ho goal neihchhun a ni zui ta a ni.
A hnuah Federico Dimarco chuan an goal thumna tur Davide Frattesi tan a siamsak a; minute sarih a liam leh hnu minute 79-ah Di Lorenzo chuan Italy goal lina leh he match-a goal lut hnuhnungber ni zui ta a thawh ve leh a, Spalletti team-in an ke lehlamin quarter-final an rap ta!
He hnehna an sualchhuah leh hmang hian League A Group Two-ah point 10 hum chungin Azzurri hian hma an hruai a, Thawhtanni zan inkhel danga 2-1-a pathumna Belgium hnehtu France chu pahnihnaah awmin, Italy nen point khatin an inthlau a; last eight lut turin Italy hian group game hnih khelh tur an la neih atangin point khat chiah an mamawh tawh!
Inkhelh bana press conference a hmachhawnnaah Italy boss Spalletti chuan first half-a an mikhualte tumruhna fakin, Di Lorenzo ball siamchhuah atangin Retegui chuan Israel a barakhaih zauh zauh reng tih a sawi a; chep tak tak karah vawi duai lo a naute’n mikhial goal-veng thlabarin an siam tih leh a team-in game ropui an khel chhuak thei tih a sawi.
|an phat atangin Italy khan inkhel an thunun nghet nghal hmiah a, mahse, a tir lamah Israel khan ‘chance’ tha zet an hmu mial a, box tlang kilsir atangin Oscar Gloukh chuan goal ban hrulah a thawnchhuak a; mikhual goalkeeper Omri Glazer dpawhin hnai set sawt atanga Retegui goal tur a dansak ve bawk.
Season hmasa maia top-tier League A lama kai chho ve chauh Israel hian point an la hmu ve lo a, an group standing-ah a mawngphah an la thawhsan zo lo tluang zel.
Israel head coach Ran Ben Shimon chuan Spalletti team thunun dan leh zanin anga an khel zui zel a nih ngat chuan an tum leh tur team dangte tan pawh an tawrhhlelhawm hle dawn niin a sawi.
A hma chiah chawlhkar liamta maiah khan sihnih faia hmahruai zet chungin Italy chuan Belgian-ho lakah 2-2 draw an hlawhchhuak thei hram a; November thla hian Belgium an luhkhung ve leh ang a, chumi hnuin an final home fixture-ah France an sui zui leh dawn a ni.