ITI lama thawhdunna tur duang
Mizorama Industrial Training Institute (ITI) tihchangtlun dan tur leh, skill development leh entrepreneurship-a Mizo thalaite hmasawnna tur sawihoin Nilaini khan Labour, Employment, Skill Development & Entrepreneurship minister kaihhruaiin department hotu dang leh Schneider Electric India Foundation (SEIF) aiawhte an thukhawm a. ITI pathuma laboratory changtlung tak din tura thawhdunna tur an ziak nghal.
LESDE department leh SEIF thawhdunna turah hian Mizorama ITI pathum – Aizawl, Lunglei leh Siaha-a electrical, solar leh industry automation course zirna tur laboratory changtlung tak din a ni anga, laboratory din leh tihhmasawnna’na sum mamawh chu SEIF-in a tum dawn a ni. Heng course zirtirtu tur ITI-a thawk (instructor) te tan SEIF-in training a buatsaih anga, ITI zirlaite tan entrepreneurship training leh awareness session buatsaih thin a ni bawk ang.
Bengaluru-a SEIF Entrepreneurship Incubation Centre-ah ITI zirlai tam zawk an intuaihriam theihna’n an thawkdun dawn bawk a ni.
LESDE minister Lalnghinglova Hmar chuan LESDE leh SEIF-in thawhdunna tha tak an nei tur chu lawmawm a tih thu a sawi a. ITI bakah college leh zirna in dangah pawh a remchan dan anga la thawhho zel a duh tih a sawi. Mizo thalaiten skill-ah theihna sang tak an nei tih a sawi. SEIF aiawhte pawhin ITI piahlamah pawh zau zawka Mizo thalaite hmasawnna’n thawhho zel tha an tih thu an sawi a ni.
ITI lama thawhdunna tur duang
Get real time updates directly on you device, subscribe now.
Prev Post
Next Post