Jail tang zingah Sunday School kai ngai miah lo zaa 4.7 chauh

Mizoram jail hrang hranga tang zingah Sunday School kai miah lo chu Kristian ni lote nena chhut tel vekin zaa 4.7 chauh an ni a, kaikim lawmman dawng tawh thin pawh zaa 68.6 an ni.Kum 2025 khan Synod Prison Ministry chuan Mizoram-a jail 10-a tang mek mi 1735 hnena zawhna inang chhan tur an pek zinga 1452-in chhanna an pek let a zirchiannaah, rawtna a siam nghal a. Jail tang zingah Sunday School kai ziktluak awm mang lo anga sawi fo thin chu a dik tawk lo tih sawiin, tang zinga Kristian ni lo, Sunday School kai ve ngailo te nen veka chhutin Sunday School kai ngai miah lo chu zaa 4.7 chauh an ni tih a sawi. Sunday School kaikim dawng tawh thin phei chu zaa 68.6 an ni a, Sunday School kai nuam ti pawh zaa 83.7 an ni a, medal pawh dawng tawh zaa 37.1 an awm.
Hetihlai hian Sunday School kai chhunzawm tluantling lo zaa 30.03 an awm thung.
“Hemi en hian, Sunday School tha tak hi a that dan tur berin kan la hmang chhuak zo lo deuh a ni thei angem? School a nihna hrereng chungin kan syllabus her rem a tul tawh a ni thei em? Nun kaihruaitu atan tha lehzual zawk tur duang thei turah inbeisei ila,” a ti.
Jail tang zingah chhungte ngaihsaktu nei loo zaa 13.2, an chhuah huna haw na tur nei lo zaa 7.3, suma intlanchhuahna tur neih loh avanga an tan chin bak tang nia insawi engemawzat an awm tih sawiin, jail an chhuahsan hnua nun bul an tan theih dan tur ngaihtuah theih a duhawm hle tiin, rawtna a siam.
Jail tang zingah chhung inkhawm nei ngai miah lo zaa 11.5, chhungkua atanga awm dan mawi leh tha inzirtirna dawng ngai miah lo zaa 3.8 chauh niin, mahni inchhungkhur inenkawlna tha ti lo zaa 17.7, nu leh pa pi leh pute hnen atanga Pathian thu dawng ngai miah lo zaa 8.1 chauh an ni. Chhung inkhawmin an nuna hmasawnna thlen ti lo zaa 10.9, harsatna tawh changa chhungtte thlawp /puitu nei lo zaa 21.1; inchhung khura Kristianna lam sawi ngai miah lo zaa 20.3, jail tan chhana chhungte puh lo zaa 28.5 an ni.
“Han en vang vang hian, han sual viau thin mah se, chhungkua hi an nun bul lo chhuahna a ni tih an pawm em em vek tihna a ni a. Chuti chung chuan chhungkuaah hmaih leh tlakchham liajn tak a awm a, chu chu enge ni ta ang?” tiin zawhna a siam a ni.
“Chhung inkhawm hi tihphungah kan nei a, chhung inkhawm nei thei zinga tel duhna tawk vel chauha kan neih thin hian kan nunah danglamna a thlen zo lo niin a lang a. Chhung inkhawmin nunah hmasawnna a thlen, titute ngeiin jail bang an zut a, Pathian lawm tlak chhung inkhawm kan din thar a tul,” tiin zirchiangtute hian rawtna an siam.