Jaishankar leh Singapore Home Minister inkawm

External Affairs Minister S Jaishankar leh Singapore Home Minister te chu Inrinni kal ta khan inkawmin ram pahnihte inkar leh khawvel hmasawn mek zel dan te, ram pahnihte inlaichinna siam that zel dan turte an sawi dun a ni. Jaishanker hi ram pahnih-Vietnam leh Singapore te tlawha a zin kual niin Vietnam-a ni li lai a cham hnu ah Singapore hi ni hnih chamin a tlawh ve leh a ni.
Jaishanker chuan a Twitter-ah “Singapore leh India ten ram pahnih inkar-a inlaichinna tha a awm theih zel dan tura kan hmathlir te kan sawi dun a. Ram pahnih leh khawvel ram hmasawn mek zel dan te Minister of Home Affairs & Law K Shanmugam nen hlim takin kan sawi dun,” tiin a sawi a ni.
S Jaishanker hian Home Minister Shanmugam hi Singapore External Affairs Minister Vivian Balakrishnan, Deputy Prime Minister Lawrence Wong, Trade and Industry Minister Gan KIm Yong leh Senior Minister Teo Chee Hean te a hmuh hnu ah a inkawmna hi an nei a ni.
Kar kalta Ningani khan Jaishankar hian Singapore Defence Minister Ng Eng Hen nen inkawmna lo nei tawh bawkin ASEAN ramte leh East Asia rama India Ambassadors te inhmuhkhawmna a kaihruai tawh bawk a ni.
Singapore Foreign Ministry chuan thuchhuah siamin Jaishankar-a’n Singapore a tlawh hian ram pahnih te inkarah inhnaih lehzualna leh hun rei tak daih tur inlaichinna te, inrintawnna nghet tak te ram pahnih inkarah a siam a ni, tiin a sawi a ni.
“Jaishankar-an Singapore ram a tlawh hian ram pahnih te thawh dunna chungchang thlirlet in, India leh Singapore Minister te hnuaia digitalisation leh skills lama hmasawn zel nana thawh dunna te, ram pahnih te inkara hmasawnna leh khawvel hmasawnna thlir hona remchang a siam a ni,” tiin Foreign Ministry thuchhuah chuan a sawi bawk a ni.