Jaishankar leh US Secy of State thar Rubio inkawm nghal

Jaishankar leh US Secy of State thar Rubio inkawm nghal
United States-a châm mek, External Affairs Minister Dr S Jaishankar chuan Thawhlehni zan khan Secretary of State thar, Marco Rubio a kawm a. America-a sorkar thar a din hnua ram dang mi a kawm hmasak ber a ni.
Jaishankar hian Rubio nena an inkawmnaah hian ram pahnihte inkungkaihna huang zauh zel dan tur te, an ram pahnih inkar thil leh khawvel huap thil pawimawh hrang hrang an sawi dun tih a sawi.
Foreign minister hi Thawhlehni zan vek khan US, Australia, India leh US telna, Quad foreign minister thutkhawm, Washington DC-a nghahah a tel bawk.
Social media-a a tar lanah Jaishankar-a hian Donald Trump-a kaihhruai sorkar lak luhnaa a tel ruala he meeting-a a tel thu a sawi a, sorkar thar lak luh a nih ruala Quad foreign minister-te thutkhawm a ko leh a thleng nghal chu Trump-a sorkarin foreign policy-a a member ramte a ngaih pawimawhzia a tilang niin a tar lang bawk.
Jaishankar-a hian Quad foreign minister-te thutkhawmah hian zau takin thil tam tak an sawiho niin a sawi a. Indo-Pacific huam chhung a zalena inhawng taka a awm reng theih dan tur te, ngialnghet tak leh a than zel theih dan tura hmalakho dan turte an sawi tih a tar lang.
Minister hian an thil sawiah zau zawka thil ngaihtuahin, inpekna thuk zawk leh thawhhona tha zawk nena hmalak ni se an ti tih a tar lang a. An thutkhawma thutlukna an siam hian khawvel buai leh thil hrang hrang chimtu awm karah Quad chuan khawvel tha zawk a awm theihna tura inpek an duhzia a tilang tih a sawi bawk.
Foreign Minister Jaishankar-a hi Thawhtanni zana Washington DC-a US Capitol-a US president atana Trump-a leh a vice president atana JD Vance lak luh inkhawmah khan India aiawhin a tel a ni.