James-a’n Lakers a chakpui

Pathianni zinga NBA regular season khelhah Los Angeles Lakers leh Golden State Warriors ten inkhel hmuhnawm an lantir. Inkhel hmuhnawm takah hian hun pangngaiah chak an awm theih loh zet hnuin overtime-a LeBron James point hnih thawhchhuah zawn hmangin LA Lakers in harsa takin hnehna an chang. Inkhel dangah champion lai Denver Nuggets in hnehna an chang ve bawk.
LA Lakers hian Golden State Warriors lakah bul an tan tha viau a, quarter hmasa pahnihah chungnung zawk an ni ve ve a. Point ngaa hmahruai chungin chawlhlawk an hmang.
Chawlhlawk hnu lamah Warriors an khel tha ta viau thung a, quarter thumnaah point 13 laiin an chungnung a, point 8 ngawtin an khingpuite an lehthal. Quarter hnuhnung berah chak zawk nih tumin point an inluh chhawk zak zak a. Lakers in hnufual zawk an nihna chhungkhat tawk chiah point an thawkchhuak a, hun pangngaiah point 118 ve ve an thawkchhuak a, chak zawk an awm thei lo phawt.
Hun pangngaiah chak zawk an awm theih loh vangin overtime khelh chhunzawm a ni a, overtime vawi khatnaah point 12 ve ve thawkchhuakin an la inhnehtawk cheu. Overtime vawi hnihnaah Warriors an chak teuh hle a, hun tawp dawn tep thlengin point khatin hma an la hruai. Second khat chiah a awm tawh laiin Lakers player pawimawh LeBron James chuan free throw atangin point a thawkchhuak zawn a, point khatin an khingpuite an lehthal ta hram a. Point 145-144 in hnehna chhinchhiahtlak an chang zui ta a ni.
Harsa taka Golden State Warriors an hneh tum hian Los Angeles Lakers tan LeBron James chuan treble-double a puitlin a, point 36 zet a thawkchhuak a, ball sawhlet vawi 20 zet a dawn tlin bakah assist vawi 12 a nei bawk. Kum 39 mi LeBron James hi NBA hetiang ti thei upa ber a ni.
Pathianni zinga inkhel dangah champion lai Denver Nuggets chuan an player pawimawh Joel Embiid tel lovin an khingpui Philadelphia 76ers chu point 111-105 in an hneh. 76ers tan hian Two-time MVP winner Nikola Jokic chu point thawkchhuak hnem ber niin,, point 26 a thawkchhuak a. Jamal Murray chuan point 23 a thawkchhuak bawk.