Jammu sector-ah India-a lut ru firfiak pung

Jammu sector-ah India-a lut ru firfiak pung
Jammu sector-a International Border kân rûk tum mi firfiakte an pung nasa hle a, New Delhi tan hlauhawm a ni phak a, anmahni puitu, overground worker-te pawh man an ni hlawm.
Jammu & Kashmir-a agency-te chuan nikum khan Pir Panjal range-ah mi firfiak dawrzawn li lai India-ah luh ruin tlang sang lamah awmhmun an khuar niin an sawi.
Intelligence agency-te chuan Lashkar-e-Taiba leh Jaish-e-Mohammed pawla tel firfiak, India-a lut ru chu tual chhung mi aiin a let nga velin an tam zawk niin an sawi.
Ministry of Home Affairs (MHA)-in an chhinchhiah dan chuan Jammu & Kashmir-ah hian mi firfiak 120 awm zingah tual chhung mi chu 20% awrh chauh niin a dang chu ram dang mi, inzirna neia a ruka India-a lut an ni.
Thla hmasa khan ralthuam keng mi firfiakten Jammu & Kashmir Rifles patrol lirthei chu Sunderbani, Rajouri district-ah an kap a. Chhuitute chuan a beitute hi tun hnaia India-a lut ru an nih an ring a, an pawl hi chhui zui mek zel an la ni.
Agency hrang hrangte chuan tual chhung police hnenah thla lo la awm leh turah hian India-a luh ruk tum an pung dawn nia an hriat thu an thlen tawh a, hei hi tun thla tira Union Home Secretary Govind Mohan-a hova venhimna thlira thutkhawmah pawh sawi chhuah a ni.
Mohan-a hi Jammu-a a vawi khat kalna niin Home Minister Amit Shah-a tirha kal a ni a, ramri vengtuten thil dinhmun an sawi avanga tir a ni.
Venhimna dinhmun thlir a nih hnuah National Investigating Agency (NIA) chuan Nilaini khan Jammu-a hmun 12 an luhchilh a, heng zingah mi firfiakte puitu ni ngeia an hriatte hmun pawh a tel.
“Hmun dapa luhchilh zingah hian overground worker (OGW)-te chenna in pawh a tel a, heng mite hi dan pawna dah firfiak pawl – Lashkar-e-Taiba (LeT) leh Jaish-e-Mohammed (JeM) nena inzawm leh a ruka puitute an ni,” tiin NIA chuan a sawi.
Agency chuan LeT leh JeM firfiakte hi International Border leh Line of Control kâna India luh ruk tumin an bei reng tih an sawi a. Intelligent-te chuan OGW leh an thawhpui, ramri hnaiha khawsaten an pui thin niin an sawi.
Kalkawng an hrilh thin bakah ei tur, awmna leh pawisa pawh an pe a. Jammu province-a hmun khawhrawk lai, birukna remchang zawng zawng pawh an hrilh thin niin NIA chuan a sawi.
India lut ru mi firfiakte hian Kathua, Udhampur, Doda, Kishtwar, Reasi, Rajouri, Poonch district-te an pan tlangpui a, Kashmir phai an pan thin bawk tih an sawi.