Jannik Sinner dinhmun a nghet

Tennis-a mipa World No. 1 ni mek Jannik Sinner chuan intihchakna damdawi hman phal loh a hman vangin thla thum chhung hrem a tuar dawn a. Hrem a tawrh chhung hian inelna lian hmachhawn tur a awm loh vangin No. 1 a nihna dinhmun a nghet a, lehpelh mai theih a ni dawn rih lo.
Intihchakna damdawi a hmang tih hriatchhuah a nih hnuin Tennis thuneitu sangte chuan Sinner hi pawisa chawitirin an hrem. Inkhel thei reng chunga hrem a ni hian sawisel a hlawh a, hremna hian duhkhawp a hlawh lo hle. Hremna hi nep an tih hlawm em vangin World Anti-Doping Agency (WADA) chu thuneitu sang zawk Court of Arbitration for Sport (CAS) lamah an zualko zui leh. CAS hian Sinner hekna hi ngun taka an ngaihtuah hnuin hremna na zawk pek phu an ti a, thla thum chhung inkhel thei lova hrem turin thutlukna thar an siam.
CAS in hremna na zawk a chungah lek bawk mah se Jannik Sinner vanneihna a kal tluang a, French Open a hmachhawn leh thei dawn chiah chiah. Inelna lian Grand Slam a hmachhawn theih dawn vangin thla thum chhung a inkhel thei dawn lo chungin point ranking point hloh tur a nei tam lo. Italian hian ranking point 11,330 a nei mek a. A hnuai chiaha awm Alexander Zverev chuan ranking point 8135 a nei mek thung a. An inthlauhna hi 3195 lai a ni. Sinner hian a chawlh chhungin point 2100 a hloh thei dawn a. Inkhel a hmachhawn leh theih hunah chuan a ranking point hi 9730 a ni thei dawn. A chunga awm mek lehpel thei turin No. 2 Alexander Zverev hian thla thum chhungin point 2500 a hlawhchhuah theih a ngai dawn a. Chhiarkawp danin Zverev hian point 2500 hlawhchhuak thei bawk mah se a taka thleng thei tura ngaih erawh a ni chiah lo.
ATP ranking-ah hian Grand Slam-a vawi li lai champion tawh Carlos Alcaraz chu point 7410 neiin pathumnaah a awm mek. Alcaraz hian inkhel thei lo Jannik Sinner lehpel thei turin point 3700 lai a mamawh ve thung. Tarlan tawh angin Jannik Sinner chawlh chhung hian inelna lian, ranking point hlawhchhuah belh hluaina tur emaw, ranking point hloh phah duaina tur khawp a tam lo va, inelna zawng hmachhawn vek theih a nih loh bawk vagin Sinner dinhmun hi a nghet tawk rih viau.
Thla thum chhung inkhel thei lo tura hrem Jannik Sinner hi April thla tir atangin training neih phalsak a ni a. May thla chaw hnu lama tan tur French Open-ah fit tha takin a inlan thei tawh dawn. Court of Arbitration for Sport (CAS) meuhin hremna na zawk pe mah se Sinner laka hremna an lek dan hian swi zui a la hlawh hle tho. Mi tam tak chuan Grand Slam em pawh awl nei lova hremna a tuar hi mak an ti a. Player dang chu nise kum khat tal inkhel thei lova hrem an nih an ring tel bawk.