Japan-a nurse hna hmu te thlah

Labour, Employment, Skill Development & Entrepreneurship Department hmalaknaa Mizo thalai Japan-a nurse hna thawk turte chu Thawhtanni khan LESDE secretary Lalramsanga Sailo hoin a thlahna hun siamsak an ni.
Heng mi paruk hi Japan leh India sawrkarin thawhhona thuthlung an siam anga kal tur an ni a. Sawrkar laipui Ministry of Skill Development NSDCI hnuaia Delhi-a Japanese tawng thla 9 chhung zir zo tawh an ni.
January 26-ah Delhi panin, chuta tang chuan Tokyo-ah thlawk lutin, an thawhna hmun tur Ishikawa an pan dawn a ni.
Anmahni bakah hian hna hmu tawh, visa la buaipui mek kal tur engemawzat an la awm a. Japanese tawng hi a thlawna zir theih a nih bakah Japan an kalna man tur zawng zawng tumsak vek an ni.