Japan lakah Germany an mualpho

Japan lakah
Germany an mualpho
Inrinni zan khan football ram ropui Germany chuan Volkswagen Arena, Wolfsburg-ah Japan an inkhelh fiampui a. An mualah 4-1 ngawta an tlawm vangin Japan ral lian lakah German ral lian an mualpho. Japan lakah chiang taka an tlawm vangin Germany manager Hansi Flick dinhmun a derthawn theih phah hial dawn.
Japan hian 2022 World Cup-ah 2-1 an hneh tawh Germany lakah bul an tan tha viau a, inkhel tan atanga minute 11-na lekah Junya Ito chuan hmahruaina goal a thun nghal der. Hma takah goal an thun vangin inrintawkna sang zawk nen an inlan zui theih phah bawk. Hma takah goal chhuah mah se Germany an insiamtha thuai a, minute 19-na lekah Leroy Sane goal thun hmangin an si phurh an sut.
Germany in an si phurh sut mah se Japan in hma an hruai nawn leh thuai a, minute 22-naah Ayase Ueda chuan hma an hruai nawn lehna goal a thun. Ueda goal thun hmang hian hun rei tak chhung hma an hruai a, minute 89-na thlenga hmahruai nan an hmang. Hun tawp dawn hnaihah an si phurh sut tuma tan khawh Germany an chesual thung a, goal hnih ngawt an chhuah belh. Minute 90-naah Japan tan Takuma Asano chuan an goal thumna a thun a, an hmahruaina a tizau.
An mualah si hnih ngawta an hnufual vangin Germany in goal thn an tum ngawrh leh zual a, na takin an khingpuite an nawr. Goal thun an tum luatah an chesual nawn leh a, goal an chhuah belh leh. Minute 90+2-ah Ao Tanaka chuan an goal lina a thun a, an chakna a nem nghet. Tanaka goal thun hnuin goal dang a luh belh tawh lova, Germany chu an mikhual Japan lakah 4-1 in an tlawm a, an mualpho zui ta a ni.
Germany hi an manager Hansi Flick hnuaiah an khel tha lo viau a. Bayern Munich manager hlui Flick hnuaiah hian vawi 25 inkhel an hmachhawn tawh a, vawi 12 chiah an chak. A hnuaiah an chet that loh em vangin Flick lakah rinhlelhna lian leh zual a awm phah a, Flick hi an ban thut lo ang tih sawi ngam a ni tawh lo. Football ram ropui Germany hi Euro 2024 thlengtu tur an ni a, an ramah ngei champion an tum dawn vangin chetthatpui thei tur manager dap an hreh lo ang. Thawhleh zan hian football a ram ropui zawk France an hmachhawn zui leh dawn a, France lakah result tha neih an tum ang.