Japan leh Spain an tlang

Australia leh New Zealand-a hmeichhe World Cup khelh mekah Japan leh Spain ten hnehna an chang zawn a, last 16 an lut. Group C atangin Colombia leh Costa Rica te an tla ve thung.
Japan 2-0 Costa Rica
Khawchhak ral lian Japan hian Dunedin Stadium, Dunedin, New Zealand-ah Costarica an hmachhawn a, chawlhlawk hmaa goal hnih an thun an chakpui a, last 16 an lut. Spain nen group champion nih an inchuh zui leh ang.
Japan hi Contarica lakah an khel tha viau a, inkhel tan phat atangin game an thunun a, an khingpuite an nawr bet nghal. Ball chang tam zawk leh hlauhawm siam tam zawk ni bawk mah se beisei angin goal an thun thei mai bik lo thung. An hun tha neih hmasak hlah bawk mah se minute 25-naah Hikaru Naomoto chuan hmahruaina goal a thun ta nghe nghe.
Hmahruaina goal an thun hnuin Japan in inrintawkna sang zawk nen an inlan zui a, phurna namen lo tak nen an khingpuite an nawr zui nghal. Na taka an khingpuite an nawr chhunzawm hi an hlawkpui a, goal an thun belh zui leh nghal zat. Goal hmahruai an thun atangin minute hnihna lekah Aoba Fujino chuan an goal hnihna a thun a, an hmahruaina a tizau.
Si hnih faia hma an hruai hnuin Japan hi an khel tha chhunzawm viau naa hun tawp thlengin goal an thun belh thei tawh lo.Costa Rica in an si phurh sutin, tlawm pumpelh an viau a. Point hlawhchhuak in, tlak pumpelh tum viau mah se an hlawhtling zo lova, si hnih faiin an tlawm leh ta nge nge a, last 16 lut zo lovin an tla zui ta a ni. Japan hian an khelh hmasak berah Colombia chu 5-0 ngawtin an lo sawp tawh a, Costa Rica lakah an chak leh tak vangin khelh hnih atangin point ruk an hmu a, last 16 an lut zui ta a ni.
Spain 5-0 Colombia
Group C-a an khelh hmasak berah si thum faia chak tawh Spain chuan Eden Park, Auckland-ah Japan lakah tlawm tawh Colombia an hmachhawn a, si nga faia hnehna changin last 16 an lut.
Spain hian Colombia lakah bul an tan tha viau a, minute 13 chhung lekin goal hnih an thun hman. Chawlhlawk hmaa goal hnih an thun bakah chawlh lawk hnu lamah goal thum an thun belh zui leh cheu. Colombia an hmachhawn tum hian minute 9-na lekah Teresa Abelleira chuan hmahruaina goal a thun. Hmahruaina goal an thun atanga minute li hnu lekah Jennifer Hermoso chuan an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah Spain an khel tha lehzual a, goal thum an thun zui leh. Minute 69-naah Alba Redondo chuan an goal thumna thunin an hmahruaina a ti zua a. Goal khat thun tawh Abelleira chuan minute 70-naah an goal lina a thun zui leh zat a. Alba Redondo chuan minute 85-naah an goal ngana thunin a tawp a khar a, si nga faiin an chak zui ta a ni.
Inelna neih mekah Spain an khel tha viau a, khelh hnihah goal 8 ngawt an thun a, point ruk hmuin last 16 an lut tawh a. Group C-ah hma an hruai mek bawk. Group stage-a an game hnuhnung berah last 16 lut tawh Japan nen inkhelin group champion nih an inchuh dawn. Spain tan group champion ni turin Japan nen indraw a tawk chauh tawh a. Japan tan erawh group champion ni turin chak ngei ngei a ngai thung.
Awlsam taka Spain leh Japan in last 16 an luh laiin Costa Rica leh Colombia erawh an khel chhe dun viau thung. Colombia hian khelh hnih atangin goal 10 an chhuah der tawh a, goal an la thun lo. Costa Rica hian khelh hnih atangin goal nga an chhuah tawh a, goal an la thun bik lo bawk. Tla chiang tawh pahnihte hi an inhmachhawn zui ve leh ang.